मुंबई (प्रतिनिधी रक्षा गोराटे) – देशभरासह राज्यात देखील कोरोना रुग्नांची संख्या दिवसेंदिवस वाढत असून सामान्य नागरिकांसह राजकारणातील अनेक बड्या नेत्यांना कोरोनाची लागण झाल्याचे समोर येत आहे. यातच काही वेळापूर्वी कर्नाटकचे मुख्यमंत्री बी. एस. येडियुरप्पा यांना पुन्हा एकदा कोरोनाची लागण झाली आहे.
विशेष म्हणजे केंद्रीय मंत्री प्रकाश जावडेकर हे देखील कोरोना पॉझिटिव्ह असल्याचे समोर आले आहे. प्रकाश जावडेकर यांनी स्वतः ट्विट करून ही माहिती दिली. तसेच मी आज कोरोना चाचणी केली असता ती पॉझिटिव्ह आली. गेल्या २-३ दिवसांत माझ्या संपर्कात आलेल्यांनी कृपया स्वत: ची चाचणी करून घ्यावी, असंही प्रकाश जावडेकरांनी सांगितलंय. तर येडियुरप्पा यांनीसुद्धा ट्विट करत कोरोना पॉझिटिव्ह झाल्याचं सांगितलंय.
ते म्हणाले, मला सौम्य ताप आल्यानंतर कोरोना चाचणी केली असता, मला संक्रमण झाल्याचं समजलं. सध्या मी ठीक आहे, पण डॉक्टरांच्या सल्ल्यानंतर मला रुग्णालयात दाखल केले जात आहे, अशी माहिती कर्नाटकचे मुख्यमंत्री येडियुरप्पा यांनी दिलीय. मुख्यमंत्री बी. एस. येडियुरप्पा यांनी अलीकडेच त्यांच्या संपर्कात आलेल्या सर्व लोकांना कोरोना चाचणी करून घेण्याचा सल्ला दिलाय. कर्नाटक मुख्यमंत्री कार्यालयाने जारी केलेल्या निवेदनात म्हटले आहे की, सीएम येडियुरप्पा यांना ताप आला होता आणि त्यानंतर ते तपासणीसाठी रामय्या रुग्णालयात गेले. तिकडे कोरोनाची चाचणी केली असता ती पॉझिटिव्ह आलीय.
