ठाणे (सहसंपादक सतीश बनसोडे) – नेदरलॅण्ड्सची राजधानी अॅमस्टरडॅमहून छुप्या मार्गाने बियाणे मागवून त्याआधारे एका फ्लॅटमध्येच भांगेची शेती करण्याचा प्रकार नारकॉटिक्स कन्ट्रोल ब्युरोने (एनसीबी) उघडकीस आणला आहे. मोठा छापा टाकून एनसीबीने ही शेती उद्ध्वस्त केली आहे.
एनसीबी मुंबईने अमली पदार्थविरोधी मोठी कारवाई हाती घेतली आहे. या अंतर्गत जावेद जहांगिर आणि अर्शद खत्री या दोन दलालांना अटक करण्यात आली. त्यांच्या चौकशीत भांगेची शेती होत असल्याची माहिती मिळाली. त्यानुसार डोंबिवलीतील पलावा सिटी येथील एका २बीएचके फ्लॅटमध्ये अशाप्रकारे शेती होत असल्याचे त्यांनी सांगितले. एनसीबीच्या पथकाने छापा टाकून शेती, तसेच त्यापासून अमली पदार्थ तयार होणारा संपूर्ण कारखाना उद्ध्वस्त केला. यावेळी भांगेच्या बियांचा एक किलो साठा जप्त करण्यात आला.
याबाबत एनसीबी मुंबईचे संचालक समीर वानखेडे यांनी सांगितले की, ‘ही शेती सौदी अरेबियातील रेहान खान या फ्लॅटमध्ये होत होती. तोच या शेतीसाठी वित्त साहाय्यदेखील पुरवत होता. तर अर्शद हा अशाप्रकारच्या शेतीमध्ये कुशल आहे. जावेद हा तयार झालेल्या भांगेच्या पानांचे वितरण दलालांना करीत होता. या पानांचे मुख्य ग्राहक मुंबई व पुण्यात आहेत. मोठमोठ्या पार्ट्यांमध्ये त्याचा पुरवठा केला जातो. मुख्य म्हणजे, ही शेती करण्यासाठी अॅमस्टरडॅमहून छुप्या मार्गाने बिया आयात केल्या जात होत्या. त्याचे पैसे बिटकॉइनमार्फत दिले जात होते.’
एनसीबीच्या अन्य कारवाईत एका आफ्रिकन नागरिकाकडून ३० ग्रॅम कोकेन जप्त करण्यात आले. ओनुराह सॅम्युएल माइक असे त्याचे नाव असून, तो नायजेरियाचा नागरिक आहे. माइक हा सॅलेस्टिअन नावाच्या नायजेरियन दलालाकडून कोकेन विकत घेत असल्याचेही चौकशीत समोर आले. सॅलेस्टिअन हा नायजेरिया-मुंबई चकरा मारून कोकेनची तस्करी करत होता.
