नवी मुंबई (प्रतिनिधी विरेंद्र म्हात्रे) – बजाज फायनान्स कंपनीच्या नावाने वाशी व सानपाडा भागात सुरू असलेल्या तीन बनवाट कॉल सेंटरवर वाशी पोलिसांनी छापे मारून बनावट कॉल सेंटर चालविणाऱ्या पाच जणांच्या टोळीला अटक केली आहे. सदरची टोळी बनावट कॉल सेंटरच्या माध्यमातून नागरिकांना कर्ज मिळवून देण्याचे अमिष दाखवून त्यांच्याकडून प्रोसेसिंग फी, जीएसटी व इन्शुरन्सच्या नावाखाली रोख रक्कम उकळून त्यांची फसवणूक करत असल्याचे तपासात निष्पन्न झाले आहे.
या कारवाईत पोलिसांनी एक लाख २० हजारांची रोख रक्कम, मोबाइल फोन, दोन मोटारसायकल व इतर साहित्य असा सुमारे चार लाख रुपये किंमतीचा मुद्देमाल जप्त केला आहे. या बनावट कॉल सेंटरच्या माध्यमातून सदर टोळीने देशभरातील शेकडो लोकांकडून लाखो रुपये उकळले असण्याची शक्यता असल्याने पोलिसांनी ग्राहकांना संपर्क साधून त्यांच्याकडून अधिक माहिती काढण्यास सुरुवात केली आहे.
या कारवाईत अटक करण्यात आलेल्यामध्ये कल्लन जान मोहम्मद मल्लीक (५३), फैजान कल्लन मल्लीक (२४), मोहम्मद जुनेद असगर उस्मानी (२०) तसेच इम्तीयाज उर्फ सोहेल मौलाना कुरेशी (२९) व शबाना सोहेल चारणीया (२५) या पाच जणांचा समावेश आहे. यातील कल्लन मलीक, फैजान मल्लीक व मोहम्मद जुनेद उस्माणी हे तिघेही दिल्लीचे असून या तिघांनी वाशी सेक्टर-१७ फ्लाझा मधील डी/२९८, वाशी हावरे इन्फोटेक पार्क तसेच सानपाडा सेक्टर-१३ या तीन ठिकाणी गाळे भाड्याने घेऊन त्यातून बजाज फायनान्स कंपनीच्या नावाने बनवाट कॉल सेंटर सुरू केले होते. त्यासाठी त्यांनी १० ते १५ तरुण-तरुणींना कामाला ठेवून त्यांच्या माध्यमातून ते नागरिकांना संपर्क साधून त्यांना बजाज फायनान्सकडून कर्ज मिळवून देण्याचे अमिष दाखवित होते.
कर्ज घेण्यासाठी तयार होणाऱ्या व्यक्तीला प्रोसेसिंग फी, जीएसटी आणि इन्शुरन्सची रक्कम दिल्ली येथील कॅनेरा बँकेत स्मार्ट इंडिया एज्युकेशन या नावाने उघडलेल्या खात्यात भरण्यास भाग पाडून त्यांची फसवणूक करत होते. अशा प्रकारच्या तक्रारीत वाढ होऊ लागल्यानंतर बजाज फायनान्स कंपनीच्या फ्रॉड कंट्रोल युनिटने वाशी पोलिसांकडे तक्रार दाखल केली होती. त्यानंतर वाशी पोलीस ठाण्याचे वरिष्ठ पोलीस निरीक्षक रमेश चव्हाण यांच्या मार्गदर्शनाखाली गुन्हे प्रकटीकरण पथकातील सहाय्यक पोलीस निरीक्षक सचिन ढगे व त्यांच्या पथकाने गत आठवड्यात वाशी फ्लाझा इमारतीत बजाज फायनान्स कंपनीच्या नावाने सुरू असलेल्या बनावट कॉल सेंटरवर छापा मारला होता. त्यांनतर सदर कॉल सेंटरचा मॅनेजर सोहेल मौलाना कुरेशी याला ताब्यात घेतले होते.
चौकशीत वाशी हावरे इन्फोटेक पार्कमध्ये दुसरे कॉल सेंटर सुरू असल्याची माहिती मिळाल्यानंतर पोलिसांनी तत्काळ छापा मारुन त्याठिकाणावरुन शबाना चारणीया या महिलेला ताब्यात घेतले. त्यानंतर पोलिसांनी सानपाडा सेक्टर-१३ भागातील तिसऱ्या कॉल सेंटरवरही छापा मारला. पोलिसांनी या तिन्ही बनावट कॉल सेंटरमधून रोख रक्कम, मोबाइल फोन व इतर टेली कॉलिंगचे साहित्य जप्त केले. त्यानंतर पोलिसांनी सदरचे बनावट कॉल सेंटर चालवणाऱ्या तिघांना दिल्लीतून अटक केली आहे.
