ठाणे (सहसंपादक सतीश बनसोडे) – एलबीटी कमी केल्याचा मोबदला म्हणून स्टेशनरी व्यावसायिकाकडून ४५ हजारांची लाच घेताना ठाणे महापालिकेच्या एलबीटी (स्थानिक संस्था कर) कार्यालयातील लिपिकास सोमवारी लाचलुचपत प्रतिबंधक विभागाने (एसीबी) रंगेहात पकडले.
शरद उघाडे असे या लिपिकाचे नाव असून, तक्रारदार यांचा स्टेशनरीचा व्यवसाय आहे. सन २०१३ ते २०१६ या वर्षाचा एलबीटी कमी केल्याचा मोबदला म्हणून उघाडे यांनी तक्रारदाराकडे ५० हजारांची लाच मागितली.
याबाबत एसीबीने पडताळणी केली असता, लाच मागितल्याचे स्पष्ट झाले. एसीबीच्या ठाणे युनिटने माजिवडा येथील एलबीटी कार्यालयात सापळा लावून उघाडे यांना तक्रारदाराकडून ४५ हजारांची लाच स्वीकारताना रंगेहात पकडले. या प्रकरणी वर्तकनगर पोलिस ठाण्यात गुन्हा दाखल करण्यात आला आहे.
