ठाणे (सहसंपादक सतीश बनसोडे) – ठाणे: आरटीपीसीआर चाचणी न करता पाचशे रुपयात एका नामांकित लॅबच्या लेटरहेडचा वापर करून भिवंडीतील महेफुज क्लिनिकल लॅबोरटरी मधून करोनाचा बनावट निगेटिव्ह अहवाल देण्यात येत असल्याची धक्कादायक बाब समोर आली आहे. गुन्हे शाखेच्या भिवंडी युनिटने या लॅबोरटरीवर कारवाई करत लॅब मालक तसेच लॅब व्यवस्थापनाचे काम पाहणारा त्याचा भाऊ आणि लॅबमधील दोन टेक्निशियन अशा चौघांना अटक केली आहे. लॅबमधून बनावट करोना अहवाल जप्त करण्यात आले आहेत. गंभीर बाब म्हणजे आरोपींनी मोठ्या प्रमाणावर आरटीपीसीआर चाचणीचे बनावट अहवाल तयार करून विक्री केल्याची बाब चौकशीमध्ये निष्पन्न झाली आहे. तसेच या लॅबोरटरीला आयसीएमआर किंवा शासनाकडून आरटीपीसीआर तपासणी करण्याची कोणतीही परवानी नसल्याची बाबही समोर आली आहे.
भिवंडीतील शांतीनगर, गैबीनर परिसरात नागरिकांची आरटीपीसीआर चाचणी न करता करोनाचे बनावट निगेटिव्ह आणि पॉझिटिव्ह अहवाल ५०० रुपयांमध्ये देण्यात येत असल्याची माहिती गुन्हे शाखेच्या भिवंडी युनिटला मिळाली होती. या माहितीनंतर वरिष्ठ पोलीस निरीक्षक अशोक होनमाने आणि त्यांच्या पथकाने महापालिकेच्या वैद्यकीय अधिकाऱ्यांची मदत घेऊन आरोपींना रंगेहाथ पकडण्यासाठी हालचाली सुरू केल्या. ज्या लॅबमधून बनावट अहवाल देण्यात येत त्या गैबीनगर येथील महेफुज क्लिनिकल लॅबोरटरीममध्ये एका डमी व्यक्तीला पाठवले. या व्यक्तीची आरटीपीसीआर चाचणीसाठी स्वॅब किंवा नमुने न घेता एका नामांकित लॅबचा लेटरहेडचा वापर करून करोनाचा बनावट निगेटिव्ह अहवाल देताना या लॅबमधील तिघांना पोलिसांनी रंगेहाथ पकडले आणि लॅबोरटरीची घेतलेल्या झडतीमध्ये एकूण बनावट ६४ अहवाल पोलिसांच्या हाती लागले. यामध्ये ५९ अहवाल निगेटिव्ह तर ५ अहवाल पॉझिटिव्ह होते. या अहवालांविषयी ताब्यात घेण्यात आलेला लॅब टेक्निशियन इनामुलहक उर्फ रब्बानी तसेच लॅब व्यवस्थापनाचे काम पाहणारा आफताब आलम मुजीबुल्ला खान यांच्याकडे पोलिसांनी अत्यंत बारकाईने चौकशी केली असता धक्कादायक बाब समोर आली. लॅबमध्येच मोबाइल, लॅपटॉप, पेनड्राइव्ह, संगणक, प्रिंटरच्या सहाय्याने करोनाचे बनावट अहवाल तयार करण्यात आल्याची कबुली त्यांनी दिली. तसेच हे अहवाल लॅबचा मालक मेहफुज आलम मुजीबुल्ला खान याच्या सांगण्यावरून तयार करण्यात येत होते, असेही उघड झाले.
परराज्यात विमानाने तसेच रेल्वेने जाणारे शिवाय कंपन्यामध्ये काम करणाऱ्या कामगारांना करोनाची आरटीपीसीआर चाचणी निगेटिव्ह असणे बंधनकारक आहे. अशा लोकांना लॅबमधून ५०० रुपयांमध्ये बनावट अहवाल तयार करून विक्री करण्यात येत होते. यापूर्वी देखील अनेक कंपन्यामधील मोठ्या प्रमाणात कामगारांचे आरटीपीसीआर तपासणीचे बनावट अहवाल विक्री करण्यात येत असल्याची बाब चौकशीमध्ये निष्पन्न झाली आहे. या कारवाईमध्ये पडघा भागातील वेगवेगळ्या कंपनीत काम करणाऱ्या कामगारांचे आरटीपीसीआर तपासणीसाठी घेतलेले ५८९ स्वॅब, ४३० आधारकार्डच्या झेरॉक्स, ५६९ आयसीएमआरचे फॉर्मही लॅबमध्ये मिळाले आहेत.
या प्रकरणी शांतीनगर पोलीस ठाण्यात गुन्हा दाखल करण्यात आल्यानंतर इनामुलहक, आफताब याच्यासह अन्य एक लॅब टेक्निशियन मोहम्मद शारीक मोहम्मद साबीर शेख या तिघांना गुन्हे शाखेने बुधवारी अटक केले. या तिघांना न्यायालयाने ३० एप्रिल पर्यंत पोलीस कोठडी दिली आहे. तर लॅब मालक मेहफुज याला गुरुवारी अटक करण्यात आले. आफताब आणि मेहफुज दोघे भाऊ असल्याची माहिती पोलिसांनी दिली. अशाप्रकारे बनावट करोना अहवाल तयार करत त्याची विक्री करणाऱ्या टोळीचा पर्दाफाश करण्याची महत्त्वपूर्ण कामगिरी पोलीस आयुक्त विवेक फणसळकर, अपर पोलीस आयुक्त (गुन्हे) संजय येनपुरे, उपायुक्त लक्ष्मीकांत पाटील, सहाय्यक पोलिस आयुक्त किसन गवळी यांच्या मार्गदर्शनाखाली गुन्हे शाखेच्या भिवंडी युनिटने केली आहे.
