औरंगाबाद (जिल्हा प्रतिनिधी दत्तात्रय मोटे) – महापालिकेच्या नशेतील अधिकारी आणि शिपायाने गुरुवारी सायंकाळी रस्त्यावर बाबा पेट्रोल पंपाजवळ गोंधळ घातला. सिग्नलवर पोलिसांनी वाहन थांबविण्याचा इशारा केल्याने वाहनातून उतरून अधिकारी चक्क रस्त्यावर आडवा झाला. पोलिसांनी त्याला उचलून बाजूला नेण्याचा प्रयत्न केल्यावर दोघांनी पोलिसांशी झटापट केली़ यात वाहतूक शाखेचे कर्मचारी किरकोळ जखमी झाले.
सूत्रांनी दिलेल्या माहितीनुसार, छावणी रस्त्याकडून जालना मार्गाकडे जाणाऱ्या वाहनांसाठी बाबा चौकातील सिग्नल लागल्याने या वेळी पांढऱ्या रंगाची कार, सिग्नलवर न थांबताच जात होती. त्यावर, अत्यावश्यक सेवा लिहिलेला पालिकेचा लोगोही होता. वाहतूक शाखेचे पोलिस कर्मचारी साबळे यांनी कार थांबविण्याचा इशारा केला, तेव्हा कारमधून एक जण खाली उतरला आणि रस्त्यावर आडवा झाला. साबळे यांनी त्याला उचलण्याचा प्रयत्न केला तेव्हा त्या अधिकाऱ्याने झटापट केली़ चौकातील बंदोबस्तावर असलेले वाहतूक शाखेचे उपनिरीक्षक राहुल भदरगे आणि इतर कर्मचाऱ्यांनी धाव घेत रस्त्यावर गोंधळ घालणाऱ्या व्यक्तीस बाजूला करण्याचा प्रयत्न केला असता कारमधून दुसरी व्यक्ती उतरल्यानंतर त्यानेही रस्त्यावर गोंधळ घातला. संबंधित अधिकारी शाखा अभियांता असल्याची माहितीही संबंधितांनी दिली.
प्रकरणाची माहिती पोलिस आयुक्त डॉ. निखिल गुप्ता यांना मिळताच त्यांनी उपायुक्त नीकेश खाटमोडे, क्रांती चौकचे निरीक्षक डॉ. गणपत दराडे, वेदांतनगरचे निरीक्षक रामेश्वर रोडे यांना घटनास्थळी जाण्याचे आदेश दिले होते. तेव्हा वरिष्ठ अधिकारी हे तातडीने घटनास्थळावर पोहचले होते. गोंधळ घालणाऱ्या दोघांना क्रांती चौक पोलिस ठाण्यात नेण्यात आले होते. रात्री दोघांची वैद्यकीय तपासणी करून त्यांच्यावर गुन्हा नोंदविण्याची कारवाई करण्यात येत होती.
