औरंगाबाद (जिल्हा प्रतिनिधी दत्तात्रय मोटे) – माजी महापौर नंदकुमार घोडेले व त्यांच्या २५ ते ३० समर्थकांनी गर्दी जमवत विनामास्क वाढदिवस साजरा केल्याप्रकरणात घोडेले यांच्यासह २५ ते ३० जणांविरोधात गुन्हा दाखल करण्यात आला आहे. हा प्रकार चार मे रोजी विटखेडा गाव (पैठण रस्ता) येथे रात्री आठ वाजेदरम्यान घडला.
या प्रकरणी सातारा पोलिस ठाण्याचे कारभारी नलावडे (५०) यांनी फिर्याद दिली. करोनाच्या वाढत्या प्रादूर्भावाच्या अनुषंगाने शासनातर्फे घालून दिलेल्या नियमांचा भंग करत घोडेले, त्यांच्या २५ ते ३० समर्थकांसह वाढदिवस साजरा करताना आढळून आले. त्यांनी मास्कही लावलेले नव्हते.
दरम्यान इतरांना बाधा पोहोचेल असे निष्काळजीपणाने वर्तन केल्याप्रकरणात सातारा पोलिस ठाण्यात गुन्हा दाखल करण्यात आला आहे. या प्रकरणाचा तपास पोलिस उपनिरीक्षक दासरे करीत आहेत.
