नवी दिल्ली – ऑक्सिजन कॉन्सेन्टेटरच्या काळाबाजार प्रकरणातला आरोपी आणि दिल्लीतील ‘खान चाचा’ रेस्टॉरन्टचा मालक नवनीत कालरा याला दिल्ली पोलिसांच्या गुन्हे शाखा विभागानं अटक केलीय. कालरा याला त्याच्या मेव्हण्याच्या गुरुग्राम भागातील फार्महाऊसवरून ताब्यात घेण्यात आलं.
यापूर्वी, नवनीत कालरा यानं अटकपूर्व जामिनासाठी उच्च न्यायालयात अर्ज केला होता. परंतु, उच्च न्यायालयानं तो फेटाळून लावला होता. आरोपींना ताब्यात घेऊन त्यांची चौकशी करण्याची गरजही यावेळी कोर्टानं व्यक्त केली होती.
काही दिवसांपूर्वी दिल्ली पोलिसांनी टाकलेल्या छाप्यांमध्ये ऑक्सिजन कॉन्सन्ट्रेटर्सचा काळाबाजार उघड झाला होता. अनेक प्रसिद्ध रेस्टॉरन्टवर छापे टाकत पोलिसांनी शेकडोंच्या संख्येत कॉन्सन्ट्रेटर्स जप्त केले होते. नवनीत कालरा या काळाबाजाराचा मास्टरमाईंड म्हणून समोर आला होता. त्यानंतर कालरा कुटुंबासहीत फरार झाला होता.
पोलिसांच्या माहितीनुसार, लंडनमध्ये बसलेल्या मॅट्रिक्स सेल्युलस कंपनीचा मालक गगन दुग्गल यांनं ऑक्सिजन कॉन्सन्ट्रेटर्सच्या काळाबाजारीचा प्लान आखला आणि नवनीत कालरानं आपल्या रेस्टॉरन्टमधून या कॉन्सन्ट्रेटर्सची विक्री काळ्याबाजारात केली. गगन दुग्गल याच्या कंपनीचा भारतातील सीईओ गौरव खन्ना आहे, हादेखील या प्रकरणात सहभागी होता.
