नवी दिल्ली (उपसंपादक जीवन षाकया) : पतीसोबत पटत नसल्याने त्याला धडा शिकवण्यासाठी महिलेने आपल्या एका नातेवाइकाच्या मदतीने घरातच चोरी केल्याचे तपासात उघड झाले असून, पोलिसांनी महिलेला आणि तिच्या नातेवाइकाला ताब्यात घेतले आहे. सीसीटीव्ही फुटेज आणि कॉल रेकॉर्डमधून या घटनेचा उलगडा करण्यात पोलिसांना यश आले आहे. नवी दिल्लीच्या द्वारका परिसरात ही घटना घडली होती.
आरोपी पत्नीचे तिच्या पतीसोबत पटत नव्हते. त्यामुळे या महिलेने स्वतःच्याच घरात चोरी करण्याचा कट रचला. तिने आपल्या एका नातेवाइकाच्या मदतीने घरात चोरी केली. पोलिसांनी महिला आणि तिच्या नातेवाइकाला ताब्यात घेतल्याची माहिती रविवारी दिली. दिल्लीच्या द्वारका परिसरात गोपाळ नगरमध्ये ११ नोव्हेंबरला दुपारी दोन ते संध्याकाळी सहा वाजताच्या दरम्यान ही घटना घडली होती. रवी हा आपल्या कुटुंबीयासोबत राहतो. घरातून रोकड आणि दागिन्यांची चोरी झाल्याची तक्रार त्याने पोलिसांत दिली होती. बाबा हरिदास नगर पोलीस ठाण्यात या प्रकरणी गुन्हा दाखल करण्यात आला होता. पोलिसांनी तपास करून चोरीचा घटनेचा उलगडा केला.
पोलिसांनी तपासादरम्यान, घराच्या आजूबाजूला असलेल्या सीसीटीव्हीमधील फुटेज तपासले. तसेच तांत्रिक मदतही घेतली. घटना घडली त्यावेळी परिसरात कोण कोण होते, या माहितीच्या आधारे पोलीस आरोपींपर्यंत पोहोचले. घटना घडली त्यावेळी घराजवळ एक व्यक्ती संशयास्पदरित्या आढळून आली. त्यानंतर त्याच्या हालचाली तपासून पाहिल्या. सीसीटीव्ही फुटेजमध्ये ती व्यक्ती नजफगढ येथून द्वारका वळणापर्यंत रिक्षातून गेल्याचे दिसून आले. त्यानंतर पोलिसांनी रिक्षाचालकाचा शोध घेतला. त्याला ताब्यात घेऊन चौकशी केली असता, त्याने महत्वाची माहिती दिली. दरम्यान, तांत्रिक मदत आणि कॉल डिटेल्स तपासल्यानंतर संशयित हा तक्रारदाराच्या पत्नीच्या संपर्कात असल्याचे आढळून आले. चौकशी केली असता ती संशयित व्यक्ती पत्नीची नातेवाइक असल्याचे उघड झाले. त्यानंतर संशयावरून तिला ताब्यात घेऊन चौकशी केली असता, तिने गुन्ह्याची कबुली दिली.
याबाबत सांगतांना ती म्हणाली की, पतीसोबत खूश नव्हते. त्याला धडा शिकवण्यासाठी चुलत भाऊ गिरीराज याच्यासोबत घरातच चोरी करण्याचा कट आखला. घटनेच्या दिवशी त्याला बोलावून घेतले. दिवाळीच्या आदल्या दिवशी गिरीराजने घरात चोरी केली. रोकड आणि दागिने घेऊन पोबारा केला. आरोपी हा राजस्थानमधील दौसा येथील रहिवासी आहे. पोलिसांनी आरोपीकडून ७८ हजार ३०० रुपये आणि सोन्याचे दागिने हस्तगत केले आहेत.
