बेंगळुरू (कर्नाटक) : येथील केम्पेगौडा आंतरराष्ट्रीय विमानतळावर सोन्याची तस्करी करणाऱ्या आठ महिलांसह दहा जणांना पकडले. त्यांच्याकडून दीड कोटी किंमतीचे तीन किलो सोने जप्त करण्यात आले आहे. सीमा शुल्क विभागाच्या अधिकाऱ्यांनी ही धडक कारवाई केली. ही सोने तस्करी करणारी आंतरराष्ट्रीय टोळी आहे. सीमा शुल्क विभागाच्या अधिकाऱ्यांनी विमानतळावर उतरताच या टोळीला हटकले. त्यांची झडती घेतली असता, त्यांच्याजवळ दीड कोटींचे दागिने सापडले.
सोन्याची तस्करी करणाऱ्या आंतरराष्ट्रीय टोळीचा सीमा शुल्क विभागाच्या पथकाने भंडाफोड केला. आठ महिला आणि दोन पुरूष अशा दहा जणांना केम्पेगौडा विमानतळावर पकडले. त्यांची झडती घेतली. त्यांच्याकडे तीन किलो सोने आढळून आले. याची किंमत अंदाजे दीड कोटी रुपये आहे. हे सर्व तस्कर श्रीलंकेहून आले होते. शहरातील विविध ठिकाणी साथीदारांना ते सोने देणार होते, अशी माहिती समोर आली आहे.
सीमा शुल्क विभागातील सूत्रांच्या माहितीनुसार, शनिवारी रात्री श्रीलंकन एअरलाइन्सच्या यूएल १७१ या विमानातून दीडशे प्रवासी बेंगळुरूत विमानतळावर उतरले. कोलंबोतील बंदरनायके आतरराष्ट्रीय विमानतळावरून हे सर्व जण या ठिकाणी आले होते. टर्मिनलवर तपासणी सुरू असताना, सीमा शुल्क विभागाच्या अधिकाऱ्यांना एका महिलेची हालचाल संशयास्पद वाटली. त्यांनी तिची झडती घेतली. तिच्याकडे चौकशीही केली. तिच्याकडे सोने सापडले. तिचे दोन साथीदारही त्याच विमानातून आले होते. त्यांनाही ताब्यात घेण्यात आले. एकूण दहा प्रवाशांची चौकशी केली असता, सोने तस्करीत सामील असल्याची कबुली त्यांनी दिली, अशी माहिती तपास अधिकाऱ्याने दिली.
श्रीलंकेतून सोन्याची तस्करी होत असल्याचीही माहिती या आरोपींनी दिली. या टोळीकडून एकूण ३ किलो सोने जप्त केले असून, चौकशी सुरू आहे. बेंगळुरूमधील कोणत्या टोळीशी हे सर्व आरोपी संबंधित आहेत, याचा तपास केला जात आहे, अशी माहिती अधिकाऱ्यांनी दिली.
