मुंबई (प्रतिनिधी हितेश मिस्त्री) : वरळी बीडीडी चाळीतील सिलिंडर स्फोटात जखमी झालेल्या चार महिन्यांच्या बालकाच्या मृत्यूप्रकरणी नायर रुग्णालयातील दोन डॉक्टर व एका परिचारिकेला निलंबित करण्यात आले आहे. ही अक्षम्य चूक असून, या प्रकरणाची त्रयस्थ समितीकडून चौकशी करण्यात येईल, असे पालिकेचे अतिरिक्त आयुक्त सुरेश काकाणी यांनी गुरुवारी नमूद केले.
रुग्णालयात आलेल्या रुग्णावर वेळीच उपचार करणे गरजेचे आहे. चार महिन्यांच्या बालकावर वेळीच उपचार होणे गरजेचे होते. परंतु यात झालेली दिरंगाई अक्षम्य असून, या प्रकरणाची गंभीर दखल घेत प्राथमिक चौकशीत तीन जणांचे निलंबन करण्यात आले आहे, असे काकाणी म्हणाले. या प्रकरणाच्या चौकशीसाठी नेमण्यात आलेल्या समितीत पालिकेचे एक डॉक्टर व खासगी रुग्णालयातील दोन डॉक्टरांचा समावेश असून, ते तीन दिवसांत अहवाल सादर करतील. त्यानंतर संबंधित दोषींवर कठोर कारवाई करण्यात येईल, असेही त्यांनी सांगितले.
पालिका रुग्णालयात काही प्रकरणांत कर्मचाऱ्यांची चूक दिसून येते. त्यामुळे येणारे रुग्ण व त्यांच्या नातेवाइकांशी कसे बोलावे, कसे मार्गदर्शन करावे, याबाबत कर्मचाऱ्यांचे समुपदेशन करण्यात येणार असल्याचे काकाणी यांनी स्पष्ट केले.
