ठाणे (सहसंपाक सतीश बनसोडे) : डोंबिवली पूर्वेकडे रेल्वे स्थानकालगत असलेल्या काँग्रेसच्या कार्यालयाची अज्ञात व्यक्तींनी तोडफोड केल्याची घटना घडली. या घटनेनंतर कार्यकर्त्यांमध्ये संतापाचे वातावरण आहे. घटनेची माहिती मिळताच काँग्रेस पदाधिकाऱ्यांनी कार्यालयाची पाहणी केली. कार्यालयाची तोडफोड करणाऱ्या अज्ञात व्यक्तींविरोधात पोलिसांनी तात्काळ गुन्हा दाखल करावा अशी मागणी प्रदेश सचिव संतोष केणे आणि काँग्रेस कार्यकर्त्यांनी केली व त्याबाबतचे पत्र सुद्धा दिले. त्यानंतर या प्रकरणी रामनगर पोलीस ठाण्यात सोमवारी अज्ञात व्यक्तींविरोधात गुन्हा दाखल करण्यात आला आहे.
सोमवारी संध्याकाळी याच विषयावरून कॉग्रेस पदाधिकारी यांची बैठक पार पडली. ही बैठक जिल्हाध्यक्ष सचिन पोटे आणि प्रदेश सचिव संतोष केणे यांच्या नेतृत्वाखाली झाली. काँग्रेस पक्षाला या कार्यालयाचा वापर करता येऊ नये, या उद्देशातून राजकीय पाठिंबा असलेल्या विकासकांनी कार्यालयाची तोडफोड करून त्यातील कागदपत्रे गहाळ केली असावी, अशी शंका काँग्रेस जिल्हाध्यक्ष सचिन पोटे यांनी उपस्थित केली आहे. पोलिसांनी गुन्हेगारांचा लवकरात लवकर शोध घ्यावा, अन्यथा आंदोलन करू, असा इशारा संतोष केणे यांनी दिला.
डोंबिवली पूर्वेतील पाटकर रोडवरील विश्वदीप सोसायटीमध्ये दुसऱ्या मजल्यावर डोंबिवली शहर काँग्रेस कमिटीचे मध्यवर्ती कार्यालय आहे. ५० वर्षांहून अधिक जुने हे कार्यालय असून सदरची इमारत जुनी झाली आहे. २५ ऑक्टोबरपासून कार्यालय बंद होते. रविवारी सकाळी जिल्हा कमिटीचे उपाध्यक्ष ज्ञानबा पौळकर हे कार्यालयात गेले असता त्यांना जिन्याचा काही भाग तुटलेला आढळून आला. त्यांनी कार्यालयात जाऊन पाहिले असता आतील सामान देखील अस्ताव्यस्त करून तोडफोड केली असल्याचे दिसले. तसेच छताचा स्लॅब देखील तुटून पडला होता. त्यांनी याची माहिती वरिष्ठांना दिली. माहिती समजताच काँग्रेसचे प्रदेश नेते संतोष केणे, नवेंदू पाठारे, अशोक कापडणे, संजय पाटील, एकनाथ म्हात्रे हे घटनास्थळी गेले. त्यानंतर रामनगर पोलीस ठाण्यात या प्रकरणी गुन्हा दाखल करण्याची मागणी केली. या प्रकरणी रामनगर पोलीस ठाण्यात सोमवारी अज्ञात व्यक्तींविरोधात गुन्हा दाखल करण्यात आला आहे.
सोमवारी सायंकाळी काँग्रेस पदाधिकाऱ्यांनी यासंबंधी एक पत्रकार परिषद घेतली. पत्रकारांशी बोलताना संतोष केणे यांनी सांगितले की, पोलिसांनी गुन्हेगारांचा लवकरात लवकर शोध घ्यावा, अन्यथा आंदोलन करू असा इशारा दिला. तर पोटे म्हणाले की, ५२ वर्षांपासून काँग्रेस पक्षाचे मध्यवर्ती कार्यालय येथे आहे. पक्षाचे कार्यालय एका रात्रीत या कार्यालयाची मोठ्या प्रमाणात तोडफोड करण्यात आली आहे. कागदपत्रे चोरीला गेली आहेत, याचा अर्थ असा होतो की ही इमारत पुनर्बांधणीसाठी गेल्यास काँग्रेस पक्षाच्या कार्यालयासाठी जागा देण्यात येऊ हाच दिसतो. यामागे राजकीय वरदहस्त असल्याशिवाय हे होणार नाही. पोलिसांनी लवकरात लवकर यामागे नक्की कोण आहे हे शोधून काढावे. जागा मालक वाघडकर यांनी आम्हाला असे लेखी लिहून द्यावे की या इमारतीचा पुनर्विकास झाला तर या ठिकाणी कॉंग्रेस पक्षाच्या कार्यालयासाठी जागा देण्यात येईल. तोपर्यंत ही इमारत होऊ देणार नाही, असा एकमताने निर्णय काँग्रेस पदाधिकारी, कार्यकर्त्यांनी घेतला असल्याचे पोटे यांनी पत्रकार परिषद घेऊन सांगितले. यावेळी जिल्हाध्यक्ष सचिन पोटे, कार्याध्यक्ष जितेंद्र भोईर, संतोष केणे, एकनाथ म्हात्रे, रवी पाटील, शरद भोईर, पमेश म्हात्रे, राहुल केणे , प्रणव केणे यांसह अनेक पदाधिकारी उपस्थित होते.
