उत्तरकाशी (उत्तराखंड) : शनिवारी सकाळी उत्तराखंडमध्ये भूकंपाचे मोठे धक्के जाणवल्याची बातमी समोर येत आहे. भूकंपाची तीव्रता रिश्टर स्केलवर ४.१ इतकी मोजण्यात आली. पहाटे भूकंपाचे धक्के जाणवल्याने स्थानिक नागरिक घाबरले. मिळालेल्या माहितीनुसार, पहाटे ५.०३ वाजता भूकंपाचे धक्के जाणवले. एएनआय या वृत्तसंस्थेनुसार, राज्याच्या उत्तरकाशी जिल्ह्याच्या पूर्वेला सुमारे ३९ किमी अंतरावर भूकंपाचे जोरदार धक्के जाणवले. तर भूकंपामुळे मालमत्तेचे कोणतेही नुकसान झाल्याची अद्याप कोणतीही माहिती नाही.
तज्ज्ञांच्या मते, भारतीय प्लेट दरवर्षी मध्य आशियाच्या दिशेने सरासरी ५ सेंटीमीटरने सरकत आहे, ज्यामुळे भूगर्भीय हालचाली सुरू आहेत. भूकंप शास्त्रज्ञांचा असा विश्वास आहे की सामान्यतः पृथ्वीच्या कवचातील २ प्लेट्सची टक्कर झाल्यानंतर दोन्ही प्लेट्स स्थिर होतात, परंतु भारतीय प्लेट अनपेक्षितपणे स्थिर झालेली नाही. युरेशियन प्लेट अंतर्गत भारतीय प्लेटमध्ये प्रवेश करण्याची प्रक्रिया सुरूच आहे, जी भूवैज्ञानिक हालचालींच्या दृष्टीने चिंतेची बाब आहे.
याआधीही जानेवारीच्या सुरुवातीला उत्तराखंडच्या बागेश्वर जिल्ह्यात भूकंपाचे धक्के जाणवले होते. त्याची तीव्रता रिश्टर स्केलवर कमी मोजली गेली, जी जाणवूही शकली नाही. त्यावेळी झालेल्या भूकंपाची तीव्रता रिश्टर स्केलवर २.५ एवढी होती. पहाटे ६.१७ वाजता बागेश्वर जिल्ह्यातील कपकोट, बागेश्वर, गरुड, कांडा, काफलीगिर आदी भागात भूकंपाचे धक्के जाणवले. थंडीमुळे लोक घरातच होते. काही ठिकाणी घरांना हादरा बसल्याने लोक घराबाहेर पडले. अद्याप भूकंपाचा केंद्रबिंदू निश्चित होऊ शकला नाही.
विशेष म्हणजे हिमालय प्रदेश भूकंपाच्या दृष्टीने अत्यंत संवेदनशील मानला जातो. हा परिसर भूकंप अनुकूल असल्याचेही तज्ज्ञांचे मत आहे. उत्तराखंड आणि आजूबाजूच्या परिसरात भूकंपाचे धक्के वारंवार जाणवत आहेत, मात्र शनिवारी सकाळी झालेल्या भूकंपाची तीव्रता थोडी जास्त होती. यापूर्वी जानेवारी महिन्यात बागेश्वरमध्ये भूकंप झाला होता, ज्याची तीव्रता रिश्टर स्केलवर २.५ इतकी होती.
