रत्नागिरी (प्रतिनिधी) : समाजमाध्यमाद्वारे झालेल्या ओळखीचा गैरफायदा घेत दापोली येथील एका अल्पवयीन मुलीवर शीतपेयातून गुंगीचं औषध देत अत्याचार केल्याचा प्रकार समोर आला होता. यानंतर एकच खळबळ उडाली आहे. याप्रकरणी दापोली पोलीस ठाण्यात नराधमाविरोधात गुन्हा दाखल करण्यात असून त्याच्या मुसक्या आवळण्यात पोलिसांना यश आले आहे. तर त्याला न्यायालयात हजर केले असता न्यायालयीन कोठडी सुनावण्यात आली आहे.
दापोली तालुक्यातील एका अल्पवयीन मुलीला सोशल मीडियावर ओळख करून तिचा विश्वास संपादन करत आरोपी युवकाने तिला जाळ्यात अडकवले. नंतर तिल चिपळूण येथील फार्महाऊसवर नेऊन तिला शितपेयामधून गुंगीचे औषध देऊन तिच्यावर अत्याचार केले आणि तिचे फोटो काढून ते समाज माध्यमावर टाकण्याची धमकी देखील दिली. याच धमकीच्या जोरावर त्याने तिच्याशी वारंवार शरिरसंबंध प्रस्थापित केले. इतकेच नाही तर याविषयी कुठेही वाच्यता केल्यास मारून टाकण्याची धमकीही त्याने दिली होती.
पोलिसांच्या माहितीनुसार, चिपळूण येथील संशयित अझहर कडवळकर याने तर अल्पवयीन मुलीशा मैत्री केली. या मैत्रीमधून तो या मुलीला एप्रिल २०२२ मध्ये चिपळूण येथील एका फार्महाउसवर घेऊन गेला व तेथे तिला शीतपेय पिण्यास दिले, तिने ते पिताच बेशुद्ध पडली. त्याचा फायदा घेऊन त्याने या मुलीशी शरीरसंबंध प्रस्थापित केले व या सर्व प्रकाराचे फोटोही काढले. नंतर हे फोटो समाजमाध्यमावर टाकणार अशी धमकीही दिली आणि तिला गुहागर व मुरुड येथील लॉजवर नेवून तिच्याशी अतिप्रसंग केल्याचा खळबळजनक प्रकार घडला आहे.
अजहर याने त्याच्याशी लग्न कर असा तगादा लावला. मात्र या मुलीने त्यासाठी नकार दिल्याने त्याने या मुलीला त्रास देण्यास सुरुवात केली. अखेर या मुलीने दापोली पोलीस ठाण्यात जाऊन अझहर विरोधात तक्रार दाखल केली आहे. या तक्रारीची दखल घेत पोलिसांनी (पॉक्सो) तसेच भारतीय न्याय संहितेच्या कलमानुसार गुन्हा दाखल करून त्याला अटक केली आहे. त्याला न्यायालयासमोर हजर केले असता त्याला प्रथम पोलीस कोठडी देण्यात आली व ती संपल्यावर त्याला न्यायालयीन कोठडीत रवानगी करण्यात आली आहे. अधिक तपास उपनिरीक्षक ज्योती चव्हाण करत आहेत. या मुलीने तक्रारीत संशयिताचे नाव अझहर कडवळकर असे दिले होते मात्र तपासात ते अझहर कडवईकर असे निष्पन्न झाले असल्याची माहिती तपास अधिकारी यांनी दिली आहे. या घटनेचा अधिक तपास दापोली पोलीस करत आहेत.
