रायगड (संपादक सुनिल पाटील) : हिंदवी स्वराज्याचे संस्थापक छत्रपती शिवाजी महाराज यांचा ३५२ वा शिवराज्याभिषेक सोहळा आज (शुक्रवार, ६ जून २०२५) दुर्गराज रायगडावर प्रचंड उत्साहात आणि दिमाखात साजरा झाला. अखिल भारतीय शिवराज्याभिषेक महोत्सव समिती आणि दुर्गराज रायगड यांच्या संयुक्त विद्यमाने आयोजित या सोहळ्यासाठी महाराष्ट्राच्या कानाकोपऱ्यातून लाखो शिवप्रेमींनी रायगडावर गर्दी केली होती, ज्यामुळे संपूर्ण वातावरण शिवमय झाले होते.
शिवराज्याभिषेक दिन सोहळ्याच्या पूर्वसंध्येला शिवभक्तांनी राजमाता जिजाऊ यांच्या पाचाड येथील समाधीला अभिवादन केले. हिंदवी स्वराज्याच्या राजधानीत पोवाड्यांचा निनाद घुमू लागला होता आणि शिवस्तुतीने डफ कडाडले.राज्याभिषेक दिन सोहळ्याच्या निमित्ताने किल्ले रायगडावर आज अक्षरशः शिवकाळ अवतरला होता, ज्यामुळे शिवप्रेमींनी ऐतिहासिक क्षणांचा अनुभव घेतला. शिवकालीन मर्दानी आणि साहसी खेळांनी सोहळ्याची शोभा वाढवली आणि उपस्थित शिवप्रेमींमध्ये उत्साह संचारला.
सकाळपासूनच शिवप्रेमींनी गडावर मोठी गर्दी केली होती. सालाबादप्रमाणे छत्रपती युवराज संभाजी राजे आणि छत्रपती शहाजी राजे यांच्या हस्ते शिवपूजन आणि दुग्धाभिषेक करण्यात आला. या प्रसंगी महाराष्ट्रातील शाहिरांनी आपल्या पोवाड्यांच्या सादरीकरणाने वातावरणात चैतन्य निर्माण केले. “जय भवानी, जय शिवाजी” आणि “छत्रपती शिवाजी महाराज की जय” च्या घोषणांनी संपूर्ण किल्ले रायगड दणाणून निघाला. या सोहळ्याला मराठा आंदोलक मनोज जरांगे पाटील आणि देशमुख कुटुंबीय देखील उपस्थित होते आणि त्यांनी छत्रपती शिवरायांच्या चरणी नतमस्तक होऊन अभिवादन केले.
