पुणे (उपसंपादक मीरा आरेकर) : ज्येष्ठ नेते एकनाथ खडसे यांचे जावई प्रांजल खेवलकर यांना पुणे पोलिसांनी रेव्ह पार्टी प्रकरणात अटक केल्यानंतर आता लपून एका महिलेचे अश्लील व्हिडिओ शूट केल्याप्रकरणी प्रांजल खेवलकर यांच्यावर पुणे सायबर पोलिसांनी गुन्हा दाखल केला आहे. महिलेच्या तक्रारीनंतर हा गुन्हा दाखल करण्यात आला असून, खेवलकर यांच्या अडचणींत वाढ झाली आहे.
मिळालेल्या माहितीनुसार, सहमती नसताना फोटो आणि व्हिडिओ काढल्याचा आरोप करत एका महिलेने प्रांजल खेवलकर यांच्याविरोधात पोलिसांत धाव घेतली. त्यानंतर पुणे सायबर पोलिसांकडून आयटी अॅक्ट 66E आणि भारतीय न्याय संहिता 77 अन्वये गुन्हा दाखल करण्यात आला. त्यामुळे आधीच रेव्ह पार्टी प्रकरणात अटकेत असलेल्या खेवलकर यांचा पाय आणखी खोलात गेला आहे.
“प्रांजल खेवलकर यांच्या लॅपटॉप आणि पेन ड्राइव्हमध्ये काही अश्लील व्हिडिओ सापडले आहेत. पीडित महिलेला कल्पना न देता तिचे लैंगिक कृत्य रेकॉर्ड केल्याचा आरोप आहे. हे सेक्स रॅकेट उघड झाल्यास, ते महाराष्ट्रातील सर्वात मोठे सेक्स रॅकेट ठरू शकते. या प्रकरणात अनेक महिला तक्रार दाखल करण्यासाठी पुढे येत आहेत. त्यामुळे परिस्थिती गंभीर आहे. अशा महिलांना संरक्षण देणे आवश्यक आहे. अत्याचार झालेल्या महिलेचे वाईट अवस्थेतील फोटो आणि व्हिडिओ काढण्यात आले आहेत. त्यामुळे ती भयभीत आहे. तिला दिलासा देणे आपले कर्तव्य आहे,” असंही महाराष्ट्र राज्य महिला आयोगाच्या अध्यक्षा रुपाली चाकणकर यांनी याप्रकरणी विधान केले आहे.
