कारवार (कर्नाटक) (वृत्तसंस्था) : उत्तर कन्नड जिल्ह्यातील कारवार विधानसभा मतदारसंघाचे काँग्रेस आमदार सतीश कृष्ण सैल यांच्या निवासस्थानावरून प्रवर्तन संचालनालयाने (ईडी) १.४१ कोटी रुपये रोख आणि त्यांच्या कुटुंबाच्या बँक लॉकरमधून ६.७५ किलोग्रॅम सोन्याचे दागिने व सोने जप्त केले आहे.
ही कारवाई मनी लॉन्ड्रिंग प्रकरणाच्या तपासादरम्यान करण्यात आली असून, याचा संबंध सैल यांच्या कंपनीमार्फत कथितरित्या बेकायदेशीर लोहखनिज निर्यातीशी आहे.प्रवर्तन संचालनालयाने शुक्रवारी (१५ ऑगस्ट २०२५) सांगितले की, १३ आणि १४ ऑगस्ट रोजी कारवार, गोवा, मुंबई आणि दिल्ली येथे छापेमारी करण्यात आली. मनी लॉन्ड्रिंग प्रतिबंधक कायदा (PMLA) अंतर्गत ही कारवाई करण्यात आली असून, यामध्ये आशापुरा माइनकेम, श्री लाल महल, स्वास्तिक स्टील्स (होसपेट), आयएलसी इंडस्ट्रीज आणि श्री लक्ष्मी वेंकटेश्वर मिनरल्स या संस्थांवरही छापे टाकण्यात आले.
ईडीने दिलेल्या निवेदनानुसार, खासदार आणि आमदारांसाठीच्या विशेष न्यायालयाने सतीश सैल यांच्यासह इतर आरोपींना श्री मल्लिकार्जुन शिपिंग प्रायव्हेट लिमिटेड या कंपनीमार्फत लोहखनिजाच्या बेकायदेशीर निर्यातीप्रकरणी दोषी ठरवले होते. ही कंपनी सैल यांच्याशी संबंधित असल्याचे सांगितले जाते. विशेष न्यायालयाच्या दोषसिद्धी आदेशावर आधारित ईडीने ही तपासणी केली. मात्र, कर्नाटक उच्च न्यायालयाने गेल्या वर्षी सैल यांना मिळालेली सात वर्षांची तुरुंगवासाची शिक्षा निलंबित केली होती.
ईडीने दस्तऐवज, ईमेल आणि इतर रेकॉर्ड्सच्या स्वरूपात काही गुन्हे सिद्ध करणारे पुरावेही जप्त केले आहेत. यापूर्वी ईडीच्या सूत्रांनी सांगितले होते की, या बेकायदेशीर लोहखनिज निर्यातीमुळे सरकारी तिजोरीला ३८ कोटी रुपयांचा तोटा झाला आहे. हे प्रकरण २०१० मध्ये कर्नाटक लोकायुक्ताने केलेल्या तपासातून समोर आले होते. या तपासात बेल्लारी ते बेलेकेरी बंदरापर्यंत सुमारे ८ लाख टन लोहखनिजाची बेकायदेशीर वाहतूक झाल्याचे उघड झाले होते.
