पुणे (जिल्हा संपादक सुहास गायकवाड) | सिंहगड रस्ता परिसरातील हिंगणे खुर्द येथे एका नराधमाने शेजारी राहणाऱ्या १५ वर्षांच्या अल्पवयीन मुलीवर लैंगिक अत्याचार केल्याची मन सुन्न करणारी घटना उघडकीस आली आहे. पीडित मुलगी अल्पवयीन असल्याने सिंहगड रस्ता पोलिसांनी या प्रकरणात अत्यंत गंभीर पावले उचलली आहेत. आरोपीविरुद्ध ‘लैंगिक अपराधांपासून बालकांचे संरक्षण कायदा’ (पोक्सो – POCSO Act) आणि नवीन ‘भारतीय न्याय संहिता’ (BNS) मधील अत्यंत कडक कायदेशीर कलमांनुसार गुन्हा दाखल करण्यात आला आहे.
पोलिसांच्या पथकाने नराधम शेजाऱ्याला तात्काळ अटक केली असून, न्यायालयाने त्याला ५ जूनपर्यंत पोलीस कोठडीत ठेवण्याचे आदेश दिले आहेत. रमेश दत्तात्रय दौंडकर (वय ३५ वर्षे, रा. दामोदर निसर्ग सोसायटी, मारुती मंदिराजवळ, हिंगणे खुर्द, सिंहगड रस्ता, पुणे) असे अटक करण्यात आलेल्या आरोपीचे नाव आहे. याप्रकरणी पीडित मुलीच्या आईने पोलिसांत फिर्याद दिली आहे.
मिळालेल्या माहितीनुसार, पीडित पंधरा वर्षीय मुलगी काही दिवसांपूर्वी तिच्या कुटुंबीयांसह अकोला जिल्ह्यातील नातेवाइकांकडे गेली होती. तेथे गेल्यानंतर अचानक तिची प्रकृती खालावली. तिला प्रचंड शारीरिक त्रास होऊ लागल्याने पालकांनी तिला उपचारासाठी अकोला येथील स्थानिक रुग्णालयात दाखल केले.मात्र, रुग्णालयातील डॉक्टरांनी तिची वैद्यकीय तपासणी केली असता, ती गर्भवती असल्याचे उघड झाले. हा धक्कादायक अहवाल समोर येताच कुटुंबीयांच्या पायाखालची जमीनच सरकली. यानंतर पालकांनी तिच्या कडे अधिक विचारपूस केली असता, पुण्यात शेजारी राहणाऱ्या रमेश दौंडकर याने तिच्यावर लैंगिक अत्याचार केल्याची अत्यंत क्लेशदायक हकीकत तिने सांगितली.
या संतापजनक प्रकारानंतर पीडितेच्या आईने अकोला जिल्ह्यातील मूर्तिजापूर पोलीस ठाण्यात धाव घेऊन तक्रार दिली. घटनेचे गांभीर्य आणि पीडितेचे वय अवघे १५ वर्षे असल्याने मूर्तिजापूर पोलिसांनी कोणताही विलंब न लावता तात्काळ ‘शून्य’ (००) क्रमांकाने (Zero FIR) गुन्हा दाखल केला. हा गुन्हा पुण्यातील सिंहगड रस्ता पोलीस ठाण्याच्या हद्दीत घडल्याने, कायदेशीर औपचारिकता पूर्ण करून हा गुन्हा पुढील तपासासाठी तात्काळ पुणे पोलिसांकडे वर्ग करण्यात आला.
“गुन्हा वर्ग होऊन येताच सिंहगड रस्ता पोलिसांनी वेगाने तपासाची चक्रे फिरवून नराधम आरोपी रमेश दौंडकर याला बेड्या ठोकल्या. पीडितेच्या अल्पवयीनत्वामुळे आरोपीविरुद्ध पोक्सो कायदा आणि भारतीय न्याय संहितेच्या (BNS) संबंधित कडक कलमांनुसार गुन्हा नोंदवण्यात आला आहे.”
आरोपीला न्यायालयात हजर केले असता, या गुन्ह्यामागील सखोल हेतू आणि चौकशीसाठी न्यायालयाने त्याला ५ जूनपर्यंत पोलीस कोठडी मंजूर केली आहे. या अत्यंत संवेदनशील घटनेचा पुढील तपास सिंहगड रस्ता पोलीस ठाण्याचे वरिष्ठ अधिकारी विनय पाटणकर यांच्या मार्गदर्शनाखाली सिंहगड पोलीस करत आहेत.
