पुणे (जिल्हा संपादक सुहास गायकवाड) | आरोग्य आणि फिटनेसला नेहमीच प्राधान्य देणाऱ्या आंबेगाव बुद्रुक येथील प्रसिद्ध ‘D Fitness Club’ (DFC) तर्फे भव्य ‘डीएफसी प्रीमियर लीग’ क्रिकेट स्पर्धेचे आयोजन करण्यात आले होते. या स्पर्धेत खेळाडूंनी आपला थरारक खेळ दाखवत मैदानात उत्कृष्ट कामगिरी केली. केवळ जिममध्ये घाम गाळणे म्हणजेच फिटनेस नव्हे, तर मैदानात उतरून संघभावना आणि खेळाडू वृत्तीने खेळणे देखील फिटनेसचाच भाग आहे, हा संदेश या स्पर्धेच्या माध्यमातून देण्यात आला.
अत्यंत चुरशीच्या झालेल्या या क्रिकेट स्पर्धेत विविध संघांनी आपला कस लावला. अंतिम सामन्यांमधील अटीतटीच्या लढतीनंतर प्रथम पारितोषिक (विजेता): यंग फायटर्स ७, द्वितीय पारितोषिक (उपविजेता): कोकण वॉरियर्स, तृतीय पारितोषिक: डीएफसी स्ट्रायकर्स यांनी प्राप्त केले.
विजेत्या आणि उपविजेत्या संघांना भव्य करंडक (Trophies) देऊन सन्मानित करण्यात आले. तसेच खेळाडूंचा उत्साह वाढवण्यासाठी मॅन ऑफ द मॅच, मॅन ऑफ द सिरीज, सर्वोत्तम फलंदाज आणि सर्वोत्तम गोलंदाज असे वैयक्तिक पुरस्कारही प्रदान करण्यात आले.
“D Fitness Club चा मुख्य उद्देश नेहमीच आरोग्याला आणि फिटनेसला प्रोत्साहन देणे हा राहिला आहे. आपल्या सर्वांमधील क्रिकेटची आवड आणि फिटनेस एकत्र आणण्यासाठी या प्रीमियर लीगचे आयोजन करण्यात आले होते,” अशी माहिती क्लबच्या वतीने देण्यात आली.
या भव्य क्रीडा महोत्सवाच्या पारितोषिक वितरण समारंभास प्रमुख पाहुणे म्हणून शिवभूमी शिक्षक मंडळाचे विश्वस्त आणि पुणे जिल्हा संस्थाचालक शिक्षण मंडळाचे सचिव ॲड. संग्रामदादा कोंडे, ‘सिनेट फार्म’चे प्रसिद्ध उद्योजक राकेशजी राठोड तसेच DFC क्लबचे संस्थापक दिनेशजी धुमाळ उपस्थित होते. उपस्थित मान्यवरांनी खेळाडूंच्या खेळाचे कौतुक करत त्यांना पुढील वाटचालीसाठी शुभेच्छा दिल्या.
पुण्यातील आंबेगाव बुद्रुक येथे पार पडलेल्या या स्पर्धेमुळे स्थानिक तरुण आणि क्रिकेट प्रेमींना आपली क्रीडा कौशल्ये दाखवण्याची एक उत्तम संधी मिळाली. संपूर्ण परिसरात या यशस्वी आयोजनाचे कौतुक होत आहे.
