भाऊ, तुम्ही बांधाल तेच तोरण!; एकनाथराव खडसेंच्या
पोस्टरवरून कमळ चिन्ह झाले गायब
जळगाव (संपादक सुनिल पाटील) – भाजपचे ज्येष्ठ नेते, माजी मंत्री एकनाथराव खडसे यांचा राष्ट्रवादी काँग्रेस पक्षातील प्रवेशाचा मुहूर्त निश्चित झाला आहे. गुरुवारी खडसे राष्ट्रवादीत प्रवेश करणार आहेत. त्या दृष्टीने जळगाव, मुक्ताईनगर व बोदवड येथील त्यांच्या समर्थकांनी मुंबईत जाण्याची तयारी केली आहे. सुमारे १०० समर्थक उद्या बुधवारी खडसेंसोबत मुंबईला रवाना होणार आहेत. यासाठी वाहनांचे ताफे देखील सज्ज झाले आहेत. मुक्ताईनगर भागात खडसे समर्थकांनी लावलेल्या फलकावरून भाजपचे पक्षचिन्ह कमळ देखील गायब झाले आहे.
गेल्या अनेक दिवसांपासून भाजप नेते एकनाथराव खडसे हे राष्ट्रवादी काँग्रेसमध्ये प्रवेश करणार अशी चर्चा सुरू आहे. खडसेंच्या राष्ट्रवादी प्रवेशाचे अनेक मुहूर्त हुकल्यानंतर आता गुरुवारी (दि. २२) ते आपली कन्या अॅड. रोहिणी खडसे-खेवलकर यांच्यासह राष्ट्रवादीत प्रवेश करीत असल्याचे निश्चित झाले आहेत. राष्ट्रवादी काँग्रेसचे अध्यक्ष शरद पवार यांच्या उपस्थितीत मुंबईत हा छोटेखानी प्रवेश सोहळा होणार आहे.
एकनाथराव खडसे यांच्या राष्ट्रवादी काँग्रेस प्रवेशाच्या पार्श्वभूमीवर मुक्ताईनगर व बोदवड तालुक्यात समर्थकांकडून जय्यत तयारी सुरु करण्यात आली आहे. यासाठी अनेक फलक देखील लावण्यात आले आहेत. या फलकांवर भाजपचे अधिकृत चिन्ह कमळ देखील टाकण्यात आलेले नाही. ‘भाऊ तुम्ही बांधाल तेच तोरण’, ‘आमचा नेता, आमचा अभिमान’, यासह ‘भाऊ आम्ही सैदव आपल्या सोबत’, असा मजकूर देखील या फलकांवर आहे.
एकनाथराव खडसे हे जळगाव, मुक्ताईनगर व बोदवड तालुक्यातील सुमारे १०० समर्थकांसह उद्या बुधवारी मुंबईसाठी रवाना होणार आहेत. जळगाव शहरातील देखील चार ते पाच माजी नगरसेवकांनी उद्या मुबंईत जाण्याची तयारी केली आहे. त्यासाठी वाहने सज्ज ठेवण्यात आली आहेत. गुरुवारी खडसे यांच्यासह प्रमुख समर्थक राष्ट्रवादीत प्रवेश करतील. त्यानंतर पुढील महिन्यात जळगावात जाहीर कार्यक्रम होवून त्यात उर्वरित समर्थक राष्ट्रवादी काँग्रेचे घड्याळ आपल्या हातात बांधणार असल्याची विश्वसनीय माहिती मिळाली आहे.
