भोपाळ (मध्यप्रदेश) – मध्य प्रदेशच्या छिंदवाडामधून एक अजब घटना समोर येतेय. आपल्या मुलावर नाराज असणाऱ्या एका शेतकरी पित्यानं आपल्या मालमत्तेपैंकी अर्धा भाग आपल्या पाळीव कुत्र्याच्या नावे केलाय. ही घटना आजुबाजुच्या परिसरात चर्चेचा विषय ठरलीय.
छिंदवाडा जिल्ह्यातील बाडीबाडा गावात ही घटना घडलीय. बाडीबाडामध्ये राहणारे ओम नारायण यांनी आपली २ एकर जमीन चक्क आपल्या लाडक्या कुत्र्याच्या नावावर केलीय. उरलेली मालमत्ता त्यांनी आपली पत्नी चंपा यांच्या नावावर केला आहे. यासाठी कायदेशीर बाबी पूर्ण करत त्यांनी आपलं मृत्यूपत्रंही बनवलंय.
शेतकरी असलेले ओम नारायण मुलाच्या वर्तवणुकीवर नाराज होते. त्यामुळे, त्यांनी आपल्या मालमत्तेचा वाटा आपल्या मुलाऐवजी कुत्र्याच्या नावे केलाय. कायदेशीरित्या शपथ पत्रावर त्यांनी आपल्या पाळीव कुत्र्याला आपला ‘वारसदार’ म्हणून घोषित केलंय.
‘माझी सेवा पत्नी आणि पाळीव कुत्रा करतो त्यामुळे मी जिवंत असेपर्यंत तेच माझ्यासाठी सर्वात प्रिय राहतील. माझ्या निधनानंतर माझी संपूर्ण जमीन-मालमत्तेचे अधिकार पत्नी चंपा वर्मा आणि पाळीव कुत्रा जॅकी यांच्याकडे असतील. सोबतच, कुत्र्याची सेवा करणाऱ्याला मालमत्तेचा पुढचा वारसदार मानलं जाईल’ असं ओम नारायण यांनी आपल्या मृत्यूपत्रात म्हटलंय. ओमनारायण वर्मा यांच्याकडे एकूण २१ एकर जमीन आहे. परंतु, कौटुंबिक वादामुळे त्यांनी आपल्या मुलाला या मालमत्तेपासून दूर ठेवण्याचा निर्णय घेतलाय.
