मुंबई (प्रतिनिधी हितेश मिस्त्री) – पहिली भारतीय स्पोर्ट्स कार कंपनी डीसी डिझाइन्स प्रायव्हेट लिमिटेडचे संस्थापक दिलीप छाब्रिया यांना सोमवारी पुन्हा अटक करण्यात आली. सिने हास्यकलाकार कपिल शर्मा याला फसविल्याप्रकरणी छाब्रिया यांच्या विरोधात वर्सोवा पोलिस ठाण्यात नव्याने गुन्हा दाखल करण्यात आला आहे. छाब्रियांच्या कोट्यवधींच्या वाहन घोटाळ्यात आणखी सहा तक्रारी पोलिसांकडे आल्या आहेत.
एकाच चेसिस आणि इंजिन नंबरची वेगवेगळ्या राज्यात अनेकदा नोंदणी, स्वतःच तयार केलेल्या कार कर्ज घेऊन स्वतः खरेदी करणे, तसेच एका वाहनावर अनेकदा कर्ज घेणे अशाप्रकारचा डीसी डिझाइन्स प्रायव्हेट लिमिटेड या कंपनीचा घोटाळा पोलिसांनी डिसेंबरच्या अखेरीस उघडकीस आणला. कंपनीच्या संचालकांविरुद्ध गुन्हा दाखल करीत संस्थापक संचालक दिलीप छाब्रिया यांना अटक करण्यात आली. दोन वेळा पोलिस कोठडी मिळाल्यानंतर छाब्रिया यांची रवानगी न्यायालयीन कोठडीत करण्यात आली. हा तपास सुरू असतानाच व्हेनेटी बस बनवून देतो, असे सांगून छाब्रिया यांनी पाच कोटी ७० लाख रुपयांना फसविल्याची तक्रार घेऊन कपिल शर्मा पोलिसांकडे पोहोचला.
कपिल शर्मा याच्या तक्ररीनंतर वर्सोवा पोलिस ठाण्यात नव्याने गुन्हा दाखल करून त्याचा तपासही गुन्हेगारी गुप्तवार्ता पथकाकडे देण्यात आला. गुन्हा दाखल होताच पोलिसांनी न्यायालयाच्या परवानगीने सोमवारी पुन्हा दिलीप छाब्रिया यांना अटक केली. आज मंगळवारी त्यांना न्यायालयात हजर करण्यात येणार आहे. व्हेनेटी बसच्या नावाखाली पाच कोटी ७० लाखांना फसविल्यानंतर छाब्रिया यांनी अर्धवट बसच्या सांगाडा पार्किंगचे एक कोटी २० लाखांचे बिल शर्माला पाठविले होते. याबाबत पोलिस तपास करीत असून, आणखी सहा तक्रारदार पुढे आले असल्याचे पोलिसांनी म्हटले आहे.
