मालेगाव (प्रतिनिधी आकाश सावंत) – शहरातील द्याने परिसरातील एका हिंदू मुलीचे बळजबरीने व बेकायदेशीरपणे धर्मांतर करून मुस्लिम युवकाशी विवाह लावून दिल्याचा आरोप होत आहे. मुलीच्या आईने याबाबत अपर पोलिस अधीक्षक चंद्रकांत खांडवी यांच्याकडे लेखी तक्रार दाखल केली आहे. या प्रकरणातील दोषींवर कारवाई करण्याची मागणीही तक्रारीत करण्यात आली आहे.
मुलीचे कुटुंबीय दशरथवाडी (ता. कोपरगाव) येथे वास्तव्यास आहेत. तिच्या आईने पोलिसांकडे केलेल्या लेखी तक्रारीत संशयित शेख सद्दाम शेख (वय २८ रा. द्याने), अब्दुल माबुद अन्सारी (वय २८ रा. नूरबाग) व जाफर अली आझाद अहमद (वय २६, रा. द्याने) यांच्यासह शहर काजी मालेगाव व नोटरी यांनी बळजबरीने दस्तावेज तयार करून धर्मांतर करण्यास भाग पडल्याचे म्हटले आहे. सन २०१८ पासून पीडित मुलगी द्याने येथील मामाकडे शिक्षणासाठी होती. त्यावेळी तिचे वय १६ वर्षे होते. ती शिक्षण घेत असताना आरोपी सद्दामने तिच्यावर लैंगिक अत्याचार केले व तिला जीवे ठार मारण्याची धमकी दिल्याने मुलगी बोलू शकली नाही. त्यांनतर वारंवार आरोपी सद्दाम, अब्दुल व जाफर यांनी तिचा छळ केला.
बेकायदेशीररित्या तिचे धर्मांतर केले. तसेच, सद्दाम हिच्यासोबत संशयित अब्दुल, जाफर व मालेगाव शहर काजी यांनी निकाह लावून दिला. मुस्लिम निकाहनामाची नोटरी करताना त्यात निकाहची तारीख नमूद केली नाही. मुलगी सज्ञान झाल्यावर मार्च २०२१ मध्ये तिचा निकाह लावून दिल्याने संबंधितांवर बाल लैंगिक अत्याचार कायद्याप्रमाणे गुन्हा दाखल करावा. शहर काजी व नोटरी अॅड आर. डी. खैरनार यांनी किती बेकायदेशीर धर्मांतरणाबाबत दस्त बनवले त्याची चौकशी करून दोषींना अटक करावी, अशी मागणी मुलीच्या आईने लेखी तक्रारीत केली आहे.
धर्मांतर झाल्याची तक्रार पीडितेच्या आईने शनिवारी (दि. ६) सायंकाळी केली. दरम्यान पीडित मुलगी व आरोपी सद्दाम हे शनिवारीच रमजानपुरा पोलिस ठाण्यात स्वतःहून हजर झाले होते. त्यांनी मुस्लिम निकाहनामाचे नोटरी कागदपत्रे पोलिसांना दाखवून या विवाहास दोघांची संमती असल्याचे पोलिसांना सांगितले. पोलिसांनी त्यांचे जबाब इन कॅमेरा घेऊन त्यांना सोडून दिले आहे.
