नागपूर (कार्यालय प्रतिनिधी) – एका पोलीस अधिकाऱ्याच्या मुलाचा मृतदेह सापडल्याने नागपुरात प्रचंड खळबळ उडाली आहे. सीताबर्डी मेट्रो रेल्वे स्टेशनसमोरील फॉर्च्युन मॉलमध्ये मृतदेह आढळून आला आहे.
नरेंद्र बघेल असे पोलीस अधिकार्याचे नाव असून त्यांच्या मुलाचा मृतदेह मॉलमध्ये आढळून आला आहे, अशी माहिती मिळते. बघेल हे सध्या एमआयडीसी पोलीस ठाण्यात कार्यरत आहेत. फॉर्च्युन मॉल गेल्या अनेक वर्षांपासून बंद आहे. ही हत्या असल्याचे सांगितले जात आहे. शहरातील अनेक वरिष्ठ पोलीस अधिकारी घटनास्थळी पोहोचले आहेत.
पोलीस उपनिरीक्षक नरेंद्र बघेल यांचा २६ वर्षीय मुलगा अभिषेक हा गेल्या दोन दिवसांपासून बेपत्ता होता, अशी माहिती मिळाली आहे. त्याचा मृतदेह फोर्च्युन मॉलच्या पार्किंगमध्ये आढळला. पोलीस सूत्रांच्या माहितीनुसार, शुक्रवारी दुपारी मॉलमधील कर्मचाऱ्यांना तरुणाचा मृतदेह दिसला. त्यांनी तात्काळ पोलीस नियंत्रण कक्षाला दूरध्वनी करून माहिती दिली.
माहिती मिळाल्यानंतर धंतोली पोलीस पथक आणि वरिष्ठ पोलीस अधिकारी घटनास्थळी पोहोचले. त्यांनी मृतदेह ताब्यात घेऊन विच्छेदनासाठी पाठवला. प्राथमिक तपासात मिळालेल्या माहितीनुसार, अभिषेकच्या शरीरावर कोणत्याची जखमा आढळून आलेल्या नाहीत. त्याच्या मृत्यूचे नेमके कारण अद्याप समजू शकलेले नाही. शवविच्छेदन अहवालानंतरच माहिती मिळू शकेल, असेही सूत्रांनी सांगितले.
