सोलापूर (जिल्हा प्रतिनिधी विजयकुमार दिवाणजी) – शहरातील पूर्व भागात असणाऱ्या श्री मार्कंडेय सहकारी रुग्णालयात मध्यरात्री ऑक्सिजनच्या टाकीचा स्फोट झाला असून त्यात दोनजण ठार झाल्याची माहिती हॉस्पिटलचे अधिकारी डॉ. माणिक गुर्रम यांनी दिली आहे. या स्फोटात एक रुग्ण व रुग्णाच्या नातेवाईकांचा मृत्यू झाला आहे.
ज्यावेळी स्फोट झाला त्या ठिकाणी रुग्णालयात उपचार घेत असलेल्या आपल्या आईला भेटायला आलेले रुग्णाचे नातेवाईक हणमंत क्षीरसागर वय वर्षे ३९ हे घटनास्थळी बेशुध्द अवस्थेत आढळून आले. त्यांच्यावर तातडीने उपचार करण्यात आले, मात्र स्फोटात उडालेल्या पावडरमुळे श्वास गुदमरून त्यांचा मृत्यू झाला आहे. तर दुसरे रुग्ण सुनील लुंगारे हे करोना उपचारासाठी दाखल झाले होते. त्याची तब्येत अगोदरच खालावली होती. त्यामुळं या स्फोटानंतरच्या दहा ते पंधरा मिनिटांनंतर त्यांचा मृत्यू झाला. असं मार्कंडेय रुग्णालयाचे अधिकारी डॉ. गुर्रम यांनी सांगितलं आहे.
मार्कंडेय रुग्णालयाच्या आवारात ऑक्सिजनचा प्लांट आहे. या प्लांटच्या दोन टाक्या असून त्यापैकी एक चालू अवस्थेत तर दुसरी बंद आहे. त्यातील बंद अवस्थेत असलेल्या टाकीत रासायनिक रिऍक्शनमुळे स्फोट झाला. हा स्फोट इतका भंयकर होता की टाकीच्या आतली पावडर पाचशे फुटांपर्यंत उडाली अन हवेत धुळीचे लोळ उठले. ही पावडर हॉस्पिटलमध्ये दाखल असलेल्या रुग्णांच्या अंगावर पण उडाली. त्यामुळं सर्वत्र एकच गोंधळाची परिस्थिती निर्माण झाली.नेमकं काय घडलं हे कुणालाच कळायला मार्ग नव्हता.त्यामुळं रुग्णालयात दाखल असलेले रुग्ण आणि त्यांचे नातेवाईक भयभीत होऊन गेले होते. या स्फोटाबाबत मार्कंडेय रुग्णालयाने अधिकृत स्फोटाचे कारण अद्याप स्पष्ट केले नाही. त्याबाबतच्या तांत्रिक बाबी पुढे पोलीस तपासांत पुढे येतील असं सांगितलं जातं आहे.
