मुंबई (प्रतिनिधी गणेश तळेकर) – मराठी चित्रपटसृष्टीतील दिग्गज कलाकार असलेले अभिनेते गिरीश ओक सध्या आपल्याला ‘अग्ग बाई सुनबाई’ या मालिकेत अभिजित राजेंची भूमिका साकारताना दिसतायत. ते सोशल मीडियावर फारसे सक्रिय नसले तरीही त्यांच्या आयुष्यातील महत्वाच्या घटना ते चाहत्यांसोबत शेअर करत असतात. २१ मार्च रोजी गिरीश यांच्या आईचं निधन झालं. या घटनेमुळे त्यांच्यावर जणू दुःखाचा डोंगर कोसळला आहे. त्यांना त्यांच्या आईची प्रचंड आठवण येत असून त्यांनी आईसाठी सोशल मीडियावर एक पोस्टदेखील शेअर केली आहे. त्यात त्यांनी त्यांच्या भावनांना वाट मोकळी करून दिली आहे.
गिरीश यांनी त्यांच्या फेसबुक अकॉउंटवर आईसाठी एक कविता शेअर केली आहे. दुसऱ्या कुणाचंतरी सांत्वन करण्यासाठी लिहिलेली ही कविता आज माझं सांत्वन करायला धावून आली, असं त्यांनी पोस्ट मध्ये लिहिलं आहे. त्यांनी लिहिलं, ‘सौ शशीकला रत्नाकर ओक’माझी आई जन्म २२ सप्टेंबर १९३७ परवाच २१ मार्च २०२१ ला मला आत्मनिर्भर करून गेली आणि कधीतरी कोणाचं तरी सांत्वन करण्यासाठी मीच केलेली ही कविता माझंच सांत्वन करायला धावून आली आणि माझ्यात सकारात्मकता भरून गेली.
https://www.facebook.com/permalink.php?story_fbid=278306487001205&id=100044655663901
आपल्या आईच्या आठवणीत व्याकुळ झालेल्या गिरीश यांनी कवितेच्या माध्यमातून स्वतःचं सांत्वन करण्याचा प्रयत्न केला आहे. आई मला आत्मनिर्भर करून केली म्हणत त्यांनी पुन्हा सकारात्मक विचार करत पुढे वाटचाल करण्याचा निर्णय घेतला आहे. अनेक चाहत्यांनी त्यांच्या पोस्टवर गिरीश यांचं सांत्वन केलं आहे.
