मुंबई (प्रतिनिधी हितेश मिस्त्री) – जिवंत व्यक्तीचे शरीर मृतांसाठी वापरण्यात येणाऱ्या कपड्याने पूर्णपणे बांधून ॲम्बुलन्समधून अंत्यसंस्कारासाठी नेत असल्याचा खोटा व्हिडिओ सोशल मीडीयावर व्हायरल करून मुंबई महापालिकेची बदनामी करणाऱ्या सुरेश नाखुआ याच्यावर भोईवाडा पोलीस ठाण्यात गुन्हा दाखल करण्यात आला आहे. पालिकेच्या तक्रारीनंतर ही कारवाई करण्यात आली. सुरेश नाखुआ हे मुंबई भाजपाचे प्रवक्ते आहेत.
सुरेश नाखुआ यांनी दोन दिवसांपूर्वी आपल्या ट्वीटर हँडलवर एक व्हिडिओ अपलोड केला होता. यामध्ये एक व्यक्ती ॲम्बुलन्समध्ये झोपली असून त्याला पायापासून डोक्यापर्यंत मृतदेहाप्रमाणे कापडात बांधण्यात आले होते. प्रत्यक्षात मात्र ही व्यक्ती जिवंत असून बाहेर येण्याचा प्रयत्न करीत असल्याचे व्हिडिओतून दिसत होते. हा व्हिडिओ ट्वीट करतानाच सुरेश नाखुआ यांनी मुंबई महापालिकेचा कारभार भोंगळ असल्याची टीका केली होती. सोशल मीडियावर हा व्हिडिओ प्रचंड व्हायरल झाला होता. मुंबई महापालिका प्रशासनाने याची गंभीर दखल घेत सर्व वॉर्ड तसेच स्मशानभूमीजवळ याबाबत विचारणा केली. मात्र, असा प्रकार कुठे घडला नसल्याचे समोर आले.
पालिका अधिकारी आणि कर्मचारी यांनी अनेकदा सुरेश नाखुआ यांना संपर्क करून याबाबत अधिक माहिती जाणून घेण्याचा प्रयत्न केला. मात्र त्यांनाही नेमके ठिकाण सांगता येत नव्हते. अखेर पालिकेने याबाबत तक्रार केल्यानंतर सुरेश नाखुआ यांच्यावर गुन्हा दाखल करण्यात आला. सुरेश यांचा प्राथमिक जबाब नोंदवण्यात आल्याचे भोईवाडा पोलिसांनी सांगितले. दरम्यान, सुरेश यांनी गुरुवारी ट्वीटरच्या माध्यमातूनच माफीनामा सादर केला आहे. या व्हिडिओचे लोकेशन मला माहीत नाही तसेच घटनेची सत्यताही स्पष्ट होवू शकलेली नाही. या व्हिडिओच्या माध्यमातून भीती पसरवण्याचा माझा कोणताही हेतु नव्हता. सदर व्हिडिओमुळे यंत्रणांना त्रास झाला असेल तर मी त्यासाठी माफी मागतो, अशा प्रकारचे ट्वीट नाखुआ यांनी केले आहे.
दरम्यान, सुरेश नाखुआ यांचे ट्वीटर हँडल व्हेरिफाइड आहे. मुंबई भाजपचे अधिकृत प्रवक्ते आणि डिजिटल मार्केटिंग कन्सल्टंट अशी त्यांनी आपली ओळख दिली आहे. ट्वीटर हँडलवर त्यांनी पंतप्रधान नरेंद्र मोदी यांच्यासोबतचा फोटो हेडर इमेज म्हणून ठेवला आहे.
