नाशिक (विशेष प्रतिनिधी) – रुग्णालयात उपचार घेत असलेला करोना रुग्ण दगावल्याने संतप्त नातेवाइकांनी रुग्णालयात गोंधळ घातला. डॉक्टरांना शिवीगाळ आणि दमदाटी करत आयसीयू विभागाच्या दरवाजावरील काचा फोडल्या. या प्रकरणी डॉक्टरांच्या तक्रारीनुसार उपनगर शहर पोलिसांनी दोघांना ताब्यात घेतले आहे.
मिळालेल्या माहितीनुसार, नाशिक रोड येथे रेडीयंट प्लस रुग्णालय असून, या रुग्णालयात पोपट दामू गोतीसे (वय ६१) यांच्यावर करोनावर उपचार सुरू होते. त्यांची प्रकृती खालावल्याने त्यांना मृत्यू झाला. त्यानंतर राम गोतीसे आणि श्याम गोतीसे ( दोघेही राहणार हिंदशक्तीनगर, पवारवाडी, नाशिक रोड ) हे बुधवारी रात्री साडेअकराच्या सुमारास रुग्णालयात आले. त्यांनी डॉक्टरांना शिवीगाळ आणि दमदाटी केली. तसेच अतिदक्षता विभागाच्या दरवाजावर लाथ मारून काचा फोडल्या. काचा फुटून त्या रुग्णालयातील नर्स तबस्सुम यांना लागल्या. यात त्या जखमी झाल्या.
या घटनेनंतर रुग्णालयात काही वेळ तणाव निर्माण झाला होता. या प्रकरणी डॉक्टर अनिकेत रामदास कड (वय २४) यांनी उपनगर पोलीस ठाण्यात तक्रार दाखल केली. वरिष्ठ पोलीस अधिकाऱ्यांसह कर्मचारी तात्काळ घटनास्थळी पोहोचले. त्यांनी घटनेची माहिती घेऊन नोंद केली. रुग्णालयात तोडफोड करणारे आरोपी राम ज्ञानेश्वर गोतीसे आणि श्याम गोतीसे यांना ताब्यात घेतले. त्यांच्याविरोधात विविध कलमांन्वये गुन्हे दाखल केले आहेत. या घटनेचा पुढील तपास करण्यात येत आहे, अशी माहिती पोलिसांनी दिली. दरम्यान, गेल्या तीन दिवसांत विविध तीन रुग्णालयात तोडफोडीच्या घटना घडल्या आहेत. त्यामुळे रुग्णालयांतील डॉक्टर आणि कर्मचाऱ्यांच्या सुरक्षिततेचा प्रश्न निर्माण झाला आहे.
