मुंबई (संपादक सुनिल पाटील) – तुरुंगाची तटबंदी भेदण्यासाठी कैदी कोणती शक्कल लढवतील याचा नेम नाही. कल्याणच्या आधारवाडी तुरुंगात तर एका कैद्याने भिंतीवर चढण्यासाठी चक्क तुरुंगात लावण्यात आलेल्या सीसीटीव्हीच्या वायरचा आधार घेतला. जबरी चोरी, घरफोडी आणि चोरीचे अनेक गुन्हे दाखल असलेल्या व सन २०१७मध्ये तुरुंगातून पळालेल्या या कैद्याला मुंबई गुन्हे शाखेच्या पथकाने नवी मुंबईतून अटक केली.
मानपाडा पोलिस ठाणे आणि महात्मा फुले पोलिस ठाण्याच्या हद्दीत दाखल असलेल्या गुन्ह्यांमध्ये डेव्हिड मुर्गेश देवेंद्र उर्फ विनायक याला अटक करून कल्याणच्या आधारवाडी तुरुंगात ठेवण्यात आले होते. २३ जुलै, २०१७ रोजी सकाळी नऊच्या सुमारास विनायक तुरुंगात लावण्यात आलेल्या सीसीटीव्हीच्या वायरच्या साहाय्याने संरक्षक भिंतीवर चढला आणि दुसऱ्या बाजूने याच वायरच्या आधारे खाली उतरला. विनायक तुरुंगात नसल्याचे लक्षात येताच त्याचा शोध घेत असताना सीसीटीव्ही फूटेज तपासले, त्यावेळी हा प्रकार लक्षात आला. याप्रकरणात कल्याणच्या खडकपाडा पोलिस ठाण्यात गुन्हा दाखल करण्यात आला होता.
विनायक सन २०१७पासून वेगवेगळ्या ठिकाणी वेषांतर करून तसेच नाव बदलून राहत होता. गेल्या अनेक दिवसांपासून वेगवेगळी पोलिस पथके त्याच्या मागावर होती. नवी मुंबई येथील उलवे येथे विनायक राहत असल्याची माहिती गुन्हे शाखा युनिट ४च्या पथकाला मिळाली. प्रभारी पोलिस निरीक्षक जगदीश भांबळ यांच्या मार्गदर्शनाखाली सहायक निरीक्षक अजय बिराजदार यांच्यासह संतोष कोयंडे, चंद्रकांत राऊत, तुकाराम सावंत, चिंतामण इरनक, श्रद्धानंद होटगीकर यांचे पथक उलवे परिसरात चार दिवसांपासून पाळत ठेवून होते. मंगळवारी विनायक दिसता क्षणी पोलिसांनी विनायक याच्या मुसक्या आवळल्या.
पळून गेल्यापासून पुन्हा पोलिसांच्या तावडीत अटकेपर्यंतच्या कालावधीत विनायक याने कन्याकुमारी-तमिळनाडू येथे जाऊन ११ घरफोड्या तसेच हत्येचा प्रयत्न केल्याचे तपासातून पुढे आले आहे.
