यवतमाळ (क्राइम रिपोर्टर आसिफ कुरैशी) – येथील जिल्हा शासकीय रुग्णालयात कार्यरत असलेल्या व स्थानिक गुन्हे शाखेने रविवारी रेमडेसिवीर इंजेक्शनच्या काळाबाजार प्रकरणी अटक केलेल्या पूनम मेश्राम या परिचारिकेने आतापर्यंत १३ रेमडेसिवीर इंजेक्शन चोरी करून काळाबाजारात विकल्याची धक्कादायक बाब तपासात समोर आली आहे. या प्रकरणी गुन्हे शाखेने परिचारिकेकडून विक्री झालेल्या इंजेक्शनमधून मिळालेली २८ हजार ७०० रुपयांची रोख रक्कम जप्त केली आहे.
करोना संसर्गाची लागण झालेल्या रुग्णांवरील उपचारात महत्त्वाचे औषध असलेल्या रेमडेसिवीर या इंजेक्शनचा गेल्या काही दिवसांपासून जिल्ह्यात प्रचंड तुटवडा निर्माण झाला आहे. या परिस्थितीत जिल्ह्यात इंजेक्शनसाठी रुग्णांच्या नातेवाइकांना वणवण करावी लागत आहे. त्यातच रेमडेसिवीरचा काळाबाजार होत असल्याची गोपनीय माहिती स्थानिक गुन्हे शाखा पथकाला मिळाली. त्यावरून गुन्हे शाखेच्या दोन वेगवेगळ्या पथकाने कळंब शहरात सापळा रचून डॉ. अक्षय तुंडलवार, मेडिकल चालक सावन पवार आणि सौरभ मोगरकर यांना ताब्यात घेत प्रथम तीन रेमडेसिवीर इंजेक्शन जप्त केली. त्यानंतर सौरभ मोगरकर याच्यासह यवतमाळमधील जाजू चौकात दुसरी कारवाई करीत बिलकीस बानो हिला ताब्यात घेऊन सहा रेमडेसिवीर इंजेक्शन ताब्यात घेण्यात आली.
एकाच दिवशी गुन्हे शाखेच्या पथकाने दोन ठिकाणी कारवाई करीत नऊ इंजेक्शन जप्त केल्याचे शहरासह जिल्ह्यात एकच खळबळ उडाली. या प्रकरणी कळंब पोलीस ठाण्यात विविध कलमांन्वये गुन्हे नोंद करण्यात आले. त्यानंतर घटनेचे गांभीर्य लक्षात घेत ताब्यात असलेल्या चौघांची चौकशी सुरू करण्यात आली. यात प्रथम
नागपूर येथील एका खासगी रुग्णालयात परिचारिका म्हणून काम करणाऱ्या शबाना अन्सारी या बिलकीस बानो हिच्या मुलीचे नाव समोर आले. त्यावरून पोलीस पथकाने तातडीने नागपूर गाठून तिला ताब्यात घेतले. दरम्यान शबानाची कसून चौकशी केली असता तिने यवतमाळ येथील सुपर स्पेशालिटी हॉस्पिटलमध्ये कंत्राटी नर्स म्हणून काम करणाऱ्यान पूनम मेश्राम हिचे नाव घेतले. त्यानंतर पोलिसांनी जिल्हा शासकीय रुग्णालयातील वसाहतीत राहणाऱ्या पूनम मेश्राम हिला ताब्यात घेवून विचारपूस सुरू केली. त्यावेळी एक दोन नव्हे तर चक्क १३ रेमडेसिवीर इंजेक्शन चोरी करून शबानाला विकल्याची कबुली तिने दिली.
पोलिसांनी पूनम हिच्याकडून २८ हजार ७०० रुपयांची रोख जप्त केली आहे. या प्रकरणाचा पुढील तपास स्थानिक गुन्हे शाखेचे प्रमुख पोलीस निरिक्षक प्रदीप परदेशी यांच्या मार्गदर्शनाखाली गुन्हे शाखा व सायबर सेलचे पोलीस निरीक्षक किशोर जुनघरे, सहायक पालीस निरीक्षक अमोल पुरी, विवेक देशमुख, विशाल भगत, गजानन करेवाड करीत आहेत.
