नवी दिल्ली – मागील वर्षभरापासून लडाखमध्ये तणाव निर्माण करणाऱ्या चीनकडून अद्यापही लष्करी हालचाली सुरू आहेत. लडाखमधील पॅन्गाँग सरोवराजवळील फिंगर ४ पासून ८ पर्यंत चीनने लष्कर मागे घेतले असले तरी रुटोगमध्ये मोठ्या प्रमाणावर शस्त्रसाठा जमवला असून सैन्याची संख्याही मोठी आहे. सॅटेलाइट फोटोमधून ही बाब समोर आली असून चीन या लष्करी तळाचे अत्याधुनिकरणही करत असल्याचे दिसून येत आहे.
‘द इंटेलिजन्स’ने ११ मे रोजी घेतलेल्या सॅटेलाइट फोटोनुसार, चीनने रुटोगमध्ये युद्ध वाहने, शस्त्रसाठा, थंड वातावरणात पुरेशी जवानांना पुरेशी उष्णता मिळावी यासाठी तंबू उभारण्यात आले आहेत. त्याशिवाय सॅटेलाइटच्या नजरेतून वाचण्यासाठी काही बराकही झाकून ठेवण्यात आल्या आहेत. चीनने याठिकाणी मोठा शस्त्रसाठी लपवून ठेवला असल्याचे तज्ज्ञांनी म्हटले आहे. समोर आलेल्या छायाचित्रांमध्ये चीनचा लष्करी तळ बराच मोठा दिसत आहे.
पॅन्गाँग सरोवराजवळ चीनकडून या लष्करी हालचाली सुरू असताना दुसरीकडे अक्साई चीनमध्ये चीन पायाभूत सुविधांमध्ये वाढ करत आहे. चीन या ठिकाणी नवीन हेलिपॅड, बराक तयार करत असल्याचे सॅटेलाइट फोटोतून समोर आले आहे. इतकंच नव्हे तर भारतालगतच्या भागातही रस्ते आणि सैनिकांच्या दळणवळणासाठी उपयोगी ठरणाऱ्या पायाभूत सुविधा वाढवत आहे.
मागील वर्षी गलवान खोऱ्यात झालेल्या हिंसक संघर्षानंतर तणाव कमी करण्यासाठी भारत आणि चीन दरम्यान लष्करी पातळीवर चर्चा सुरू झाली आहे. मात्र, त्याच वेळेस डेपसांग प्लेन, गलवान खोरे, हॉट स्प्रिंग आणि पॅन्गाँग सरोवराजवळ चीनने मोठ्या प्रमाणावर सैन्य जमा केले आहे. भारत-चीन दरम्यान चर्चा सुरू असली त्यातून अद्याप समाधानकारक तोडगा निघाला नाही.
