मुंबई (प्रतिनिधी हितेश मिस्त्री) – अँटिलिया स्फोटकं आणि मनसुख हिरन मृत्यू प्रकरणी अटकेत असलेले सचिन वाझे, रियाझुद्दीन काझी यांच्यानंतर कॉन्स्टेबल विनायक शिंदे यालाही पोलीस सेवेतून बडतर्फ करण्यात आले आहे. मुंबईचे पोलीस आयुक्त हेमंत नगराळे यांनी विशेषाधिकाराचा वापर करून ही कारवाई केली आहे. लखनभय्या बनावट एन्काऊंटर प्रकरणात अटक झाल्यानंतरच विनायक शिंदे निलंबित होता. करोना संसर्गामुळे पॅरोलवर तुरूंगाबाहेर आल्यानंतर वाझे यांच्यासोबत कटात तो सहाभागी झाला. त्यामुळेच त्याला अटक करण्यात आलेली आहे.
उद्योगपती मुकेश अंबानी यांच्या अँटिलिया या निवासस्थानाबाहेर एका स्कॉर्पिओ कारमध्ये स्फोटकं ठेवण्यात आल्याचे उघड झाल्यानंतर या प्रकरणाने अनेक नाट्यमय वळणे घेतली. त्यात स्कॉर्पिओचा मालक मनसुख हिरन याचा संशयास्पद मृत्यू झाल्याने हे प्रकरण अधिकच गंभीर बनलं. या प्रकरणात मुंबई क्राइम ब्रांचमधील अधिकारी सचिन वाझे यांचे नाव पुढे आल्याने एकच खळबळ उडाली. एनआयएने याप्रकरणी सचिन वाझे, त्यांचे सहकारी रियाझुद्दीन काझी तसेच निलंबित कॉन्स्टेबल विनायक शिंदे यालाही अटक केलेली आहे. एकीकडे ही कारवाई झाली असताना दुसरीकडे मुंबईचे पोलीस आयुक्त हेमंत नगराळे यांनीही या तिघांना झटका दिला आहे.
परमबीर सिंग यांच्या बदलीनंतर मुंबई पोलीस आयुक्तपदाची सूत्रे हाती घेणाऱ्या नगराळे यांनी आपले विशेषाधिकार वापरत अटकेतील तिघांवरही कारवाईचा बडगा उगारला. नगराळे यांनी प्रथम सचिन वाझे यांना सेवेतून बडतर्फ केले. त्यानंतर रियाझुद्दीन काझी यांच्यावर कारवाई करण्यात आली आणि आज विनायक शिंदेलाही सेवेतून बडतर्फ करण्यात आले आहे.
छोटा राजनचा साथीदार लखनभय्या याच्या बनावट एन्काऊंटर प्रकरणात अटक झाल्यानंतरच विनायक शिंदे याला निलंबित करण्यात आले होते. या प्रकरणात २०१३ मध्ये शिंदे याला जन्मठेपेची शिक्षा ठोठावण्यात आलेली आहे. करोना संसर्गामुळे पॅरोलवर तुरूंगाबाहेर आल्यानंतर वाझे यांच्यासोबत कटात तो सहभागी झाला होता. त्यामुळेच त्याला एनआयएकडून अटक करण्यात आलेली आहे.
