मलालाविरोधात एक माहितीपटही प्रकाशित : इस्लामविरोधी असल्याचा दावा
नवी दिल्ली : मुलांच्या शिक्षणासाठी दहशतवाद्यांचा हल्ला झेलणारी आणि १७ व्या वर्षी नोबेल पुरस्कार मिळवणारी सामाजिक कार्यकर्ता मलाला युसूफजई पुन्हा एकदा चर्चेत आहे. पाकिस्तानमध्ये मलालाविरोधात खासगी शाळांच्या संघटनांनी मोहीम छेडली आहे. मलाला ही इस्लामविरोधी असून आमची मुले बिघडू नये यासाठी तिच्या विरोधात मोहीम सुरू करत असल्याचे या संघटनांनी सांगितले.
खासगी शाळांच्या संघटनांनी यासाठी एक व्हिडिओ प्रसिद्ध केला आहे. यामध्ये मलाला ही इस्लामविरोधी असल्याचे सांगण्यात आले आहे. मलालाविरोधात एक माहितीपटही प्रकाशित करण्यात आला आहे. त्यामध्ये मलाला ही इस्लाम, विवाह पद्धतीविरोधात पाश्चिमात्य देशांचा अजेंडा राबवत असल्याचे म्हटले.
या माहितीपटात मलालाला इस्लामविरोधी ठरवण्यात आले आहे. शालेय संघटनांनी म्हटले की, मलाला ही पाश्चिमात्य देशांचा अजेंडा राबवत आहे. त्यांच्या इशाऱ्याने इस्लामविरोधात बेताल वक्तव्ये करत आहे. मलाला विवाहाविरोधातही वक्तव्य करत आहे. पाश्चिमात्य देशांच्या अजेंडा राबवून इस्लामला कमकुवत करण्याचा डाव असल्याचा आरोप संघटनांनी केला आहे.
पाकिस्तानमधील दोन लाख खासगी शाळांमधील विद्यार्थ्यांसमोर मलालाचा खरा चेहरा उघड करणार असल्याचा दावा खासगी शाळांच्या संघटनांनी केला आहे. दोन कोटींहून अधिक विद्यार्थ्यांपर्यंत मलाला इस्लामविरोधी कृत्य करत असल्याचे सांगण्यात येणार आहे. मलाला उघडं पाडणे हे आमचे लक्ष्य असून भविष्यात तिच्या बोलण्यात, प्रभावात पाकिस्तानी युवक फसणार नाही.
