दिल्ली (उपसंपादक जीवन षाकया) : आपल्यावर वरिष्ठ डॉक्टरने बलात्कार केल्याचा आरोप दिल्लीतील ऑल इंडिया इन्स्टिट्यूट ऑफ मेडिकल सायन्स (एम्स) मध्ये काम करणाऱ्या एका महिला डॉक्टरनेकेला आहे. वाढदिवसाच्या पार्टीदरम्यान एका वरिष्ठ डॉक्टरने बलात्कार केला होता. ही घटना २६ सप्टेंबरला एम्सच्या कॅम्पसमध्ये वाढदिवसाच्या पार्टीवेळी घडली होती, असा आरोप पीडित महिला डॉक्टराने तक्रारीत केला आहे.
या बलात्कार प्रकरणातील आरोपी वरिष्ठ डॉक्टर फरार आहे आणि त्याला लवकरात लवकर अटक करण्याचे प्रयत्न सुरू आहेत. पोलिसांना ११ ऑक्टोबरला या प्रकरणाची माहिती मिळाली. पीडित महिला डॉक्टरने ११ ऑक्टोबरला हौज खास पोलिस स्टेशन तक्रार केली. यानंतर हे प्रकरण समोर आलं.
पीडित महिला डॉक्टरची तक्रार नोंदवण्यात आली आणि वैद्यकीय-कायदेशीर चाचणी (एमएलसी) देखील घेण्यात आली, अशी माहिती पोलिसांनी दिली. आरोपीवर कलम ३७६ (बलात्काराची शिक्षा) आणि ३७७ (अनैसर्गिक गुन्हे) अंतर्गत गुन्हा दाखल करण्यात आला आहे, अशी माहिती दक्षिण दिल्लीच्या पोलीस उपायुक्तांनी दिली आहे.
या माहितीनंतर पोलीस रुग्णालयात गेले आणि त्यांनी एमएलसी गोळा केली. एम्स हॉस्पिटलमध्ये डॉक्टर असलेल्या पीडित महिलेची भेट देखील घेतली. एका सहकाऱ्याचा वाढदिवस साजरा करण्यासाठी पीडित महिला डॉक्टर वरिष्ठ डॉक्टरने खोलीत गेली होती. त्यावेळी आरोपी डॉक्टरने बळजबरी करत बलात्कार केला होता, असं पीडित महिला डॉक्टरने म्हटलं आहे.
तपासादरम्यान पीडित महिला डॉक्टरचा जबाब कलम १६४ सीआरपीसीनुसार दंडाधिकाऱ्यांसमोर नोंदवण्यात आला आहे. या प्रकरणी आरोपीच्या ठिकाणांवर छापे टाकले जात आहेत. आरोपीचा शोध घेण्यासाठी आणि त्याला अटक करण्यासाठी तांत्रिक पाळत ठेवली जात आहे. लवकरात लवकर अटक करण्याचा प्रयत्न सुरू आहे, अशी माहिती पोलीस उपायुक्तांनी दिली.
