मुंबई (प्रतिनिधी रक्षा गोराटे) : जुन्या घरातील फर्निचर ऑनलाइन विकू पाहणाऱ्या भारत पेट्रोलियमच्या एका अधिकाऱ्याची सायबर भामट्यांनी ३० लाख रुपयांची फसवणूक केल्याचे उघड झाले आहे. हे फर्निचर तर विकले गेलेच नाही, उलटपक्षी ३० लाख रुपयांची फसवणूक झाल्याने या अधिकाऱ्यास मोठा धक्का बसला आहे.
भारत पेट्रोलियमच्या या अधिकाऱ्याने अंबोली येथे एक प्रशस्त फ्लॅट खरेदी केला. या फ्लॅटमध्ये जुन्या घरातील फर्निचर नको म्हणून त्याने फेसबुक तसेच, ऑनलाइन विक्री करणाऱ्या एका संकेतस्थळावर त्याने फर्निचरचे फोटो आणि अपेक्षित किंमत अपलोड केली. अंकितक कुमारी नाव सांगणाऱ्या एका महिलेने या अधिकाऱ्याशी संपर्क साधला आणि फर्निचर आवडल्याचे सांगितले. फर्निचर आणि एसीसाठी आगाऊ रक्कम देण्यासाठी या महिलेने अधिकाऱ्याच्या गुगल पे खात्याचा तपशील मागवला. खात्री करण्यासाठी या खात्यावर आधी दोन रुपये पाठविले. अधिकाऱ्याने ते मिळाल्याचे सांगताच या महिलेने त्यांना एक क्यूआर कोड पाठवून तो स्कॅन करण्यास सांगितले. अधिकाऱ्याने हा क्यू आर कोड स्कॅन करताच पैसे येण्याऐवजी त्याच्या खात्यामधून ७९ हजार रुपये वजा झाले. याबाबत अधिकाऱ्याने विचारले असता माझ्याकडून चुकून झाले असून माझ्या पतीसोबत बोला, असे सांगून तिने एका व्यक्तीकडे फोन दिला.
काही तांत्रिक बिघाडामुळे पैसे वजा झाल्याचे सांगून या महिलेच्या पतीने या अधिकाऱ्याला दोन-तीन वेगवेगळ्या बँकांचे खाते क्रमांक दिले. त्यानंतर तब्बल सात ते आठवेळा क्यूआर कोड पाठवून तो स्कॅन करण्यास सांगण्यात आले. याप्रकारे वेगवेगळ्या पद्धतीने व्यवहार करून या अधिकाऱ्याच्या खात्यामधून तब्बल २९ लाख ५६ हजार रुपयांवर डल्ला मारण्यात आला.
या भामट्याने काही दिवसांनी पुन्हा फोन करून या अधिकाऱ्यास एक खाते क्रमांक देऊन त्यावर थोडे पैसे पाठविण्यास सांगितले. या खात्यावर पैसे आल्यावर तुमची सर्व रक्कम पुन्हा मिळेल असे हा भामटा म्हणाला. पैसे पाठविण्याआधी अधिकाऱ्याने हा प्रकार आपल्या मुलास सांगितला. आपली फसवणूक झाल्याचे मुलाने सांगितल्यावर त्यांना धक्काच बसला. यानंतर त्यांनी सायबर पोलिस ठाण्यात तक्रार केली.
