औरंगाबाद (जिल्हा प्रतिनिधी दत्तात्रय मोटे) : आपल्या मागण्यासाठी अनेकदा एखाद्या व्यक्तीकडून आत्मदहन करण्याचा इशारा दिला जातो किंवा तसा प्रयत्न केला जातो. पण औरंगाबादच्या एका गावातील संपर्ण सोसायटीकडून एकाचवेळी मोठ-मोठे खड्डे करून आत्मदहनाचा प्रयत्न करण्यात आला आहे. मात्र पोलिसांनी त्यांना आत्मदहन करण्यापासून रोखत ताब्यात घेतलं आहे. त्यामुळे मोठा अनर्थ टळला आहे. ही घटना औरंगाबादच्या बिडकीन येथे समोर आली आहे.
पैठण तालुक्यात असलेल्या बिडकीन येथील बाजार तळाजवळ असलेल्या पद्मावती नगर येथे गेल्या अनेक वर्षांपासून नागरिक राहतात. मात्र या वस्तीच्या बाजूलाच असलेल्या गट नं. ५८९ चे संपूर्ण एन ऐ. लेआऊटची प्लॉटींग असुन त्या प्लॉटची पुर्ण विक्री झाली आहे. परंतु त्यामध्ये ९ मीटर व ५ मीटर या रस्त्यावर अतिक्रमण झाले असुन त्यामुळे पद्मावती नगरमधील नागरिकांना येण्याजाण्यासाठी रस्ताची मोठी अडचण आहे. यासाठी संबधित विभागाकडे अनेकदा पत्रव्यवहार करूनही कारवाई होत नसल्याने या भागातील नागरिकांनी आत्मदहनाचा इशारा दिला होता.
गुरुवारी पद्मावती नगरच्या नागरिकांनी परिसरातील गणपती मंदिराच्या मोकळ्या जागेमध्ये मोठ-मोठे खड्डे करून त्यात उतरून स्व:ताला पुरून घेत आत्मदहन करण्याचा प्रयत्न केला. मात्र बंदोबस्तसाठी उपस्थित असलेल्या पोलिसांनी त्यांना खड्ड्यातून बाहेर काढत ताब्यात घेतेले. तसेच बिडकीन पोलिसात नेऊन कायदेशीर कारवाई केली आहे. मात्र एकाचवेळी संपूर्ण सोसायटीचा आत्मदहनाचा प्रयत्न करण्याची बातमी परिसरात चर्चेचा विषय बनली होती.
