शिर्डी (प्रतिनिधी तुषार महाजन) । “श्रद्धा आणि सबुरी”चा संदेश देणाऱ्या साईबाबांच्या पावन भूमीत माणुसकी आणि प्रामाणिकपणा अजूनही जिवंत असल्याचा प्रत्यय आज पुन्हा एकदा आला. श्री साईबाबा समाधी मंदिराच्या सुरक्षा विभागात कार्यरत असलेल्या एका कर्तव्यदक्ष कर्मचाऱ्याने ३० हजार रुपयांची रोकड असलेले पाकीट मूळ मालकाला परत करून प्रामाणिकपणाचे उत्तम उदाहरण समाजासमोर ठेवले आहे.
आज रोजी श्री साईबाबा समाधी मंदिराच्या ‘वयोवृद्ध गेट’वर (Senior Citizen Gate) संरक्षण विभागाचे कर्मचारी श्री. संजय शिंदे हे आपली ड्युटी बजावत होते. भक्तांच्या गर्दीत त्यांना गेटजवळ एक बेवारस पाकीट आढळून आले. शिंदे यांनी ते पाकीट उघडून पाहिले असता, त्यामध्ये तब्बल ३०, हजार रुपयांची रोख रक्कम असल्याचे निदर्शनास आले. क्षणाचाही विलंब न करता किंवा कोणत्याही मोहमायेला बळी न पडता, श्री. शिंदे यांनी हे पाकीट तातडीने संरक्षण कार्यालयात नेऊन जमा केले.
काही वेळाने मुंबई (मालाड) येथील रहिवासी आणि ज्येष्ठ साईभक्त सौ. सुषमा संगय्या परे या हताश अवस्थेत संरक्षण कार्यालयात आल्या. त्यांनी आपले पाकीट हरवल्याची तक्रार केली. संरक्षण विभागाच्या अधिकाऱ्यांनी योग्य ती कायदेशीर पडताळणी केली असता, श्री. शिंदे यांना सापडलेले पाकीट हे सौ. परे यांचेच असल्याची खात्री पटली. त्यानंतर ही रक्कम त्यांना सुपूर्द करण्यात आली. आपली कष्टाची कमाई परत मिळाल्याचे पाहून सौ. सुषमा परे भारावून गेल्या आणि त्यांनी सुरक्षा कर्मचाऱ्याचे मनापासून आभार मानले.
श्री. संजय शिंदे यांच्या या आदर्शवत आणि प्रामाणिक कामगिरीची दखल घेत साईबाबा संस्थानच्या वरिष्ठ अधिकाऱ्यांनी त्यांचे विशेष अभिनंदन केले आहे.यावेळी साई संस्थानचे मुख्य कार्यकारी अधिकारी गोरक्ष गाडीलकर, मंदिर सुरक्षा पोलीस उपनिरीक्षक रोहिदास माळी आणि साई संस्थान एम्पलॉइज सोसायटीचे चेअरमन विठ्ठलराव पवार यांनी श्री. शिंदे यांच्या पाठीवर कौतुकाची थाप दिली. शिर्डीत येणाऱ्या भक्तांना केवळ देवाचे दर्शनच नाही, तर येथील कर्मचाऱ्यांच्या रूपाने माणुसकीचे दर्शनही घडत असल्याची चर्चा आता साईनगरीत होत आहे.
