जळगाव (तालुका क्राइम रिपोर्टर मनोज नाले) । तालुक्यातील महत्त्वाचे केंद्र असलेल्या नशिराबाद पोलीस स्टेशनच्या सहाय्यक पोलीस निरीक्षक (API) पदी योगिता मधुकर नारखेडे यांची नियुक्ती करण्यात आली आहे. जिल्हा पोलीस अधीक्षकांनी याबाबतचे आदेश निर्गमित केले असून, त्यांनी नुकताच आपल्या पदाचा पदभार स्वीकारला आहे.
योगिता नारखेडे यांची जळगाव जिल्ह्यातील एक अभ्यासू आणि कर्तव्यदक्ष अधिकारी म्हणून ओळख आहे. यापूर्वी त्यांनी जिल्ह्यातील विविध विभागांत आपली सेवा बजावली असून, त्यांचा कामाचा अनुभव मोठा आहे. नशिराबाद हे गाव राष्ट्रीय महामार्गावर असल्याने आणि वाढत्या लोकसंख्येमुळे या पोलीस स्टेशनची जबाबदारी आव्हानात्मक मानली जाते.
पदभार स्वीकारल्यानंतर बोलताना त्यांनी सांगितले की, “परिसरातील शांतता आणि सुव्यवस्था राखण्याला माझे पहिले प्राधान्य असेल. अवैध धंदे आणि गुन्हेगारी प्रवृत्तींविरुद्ध कडक पावले उचलली जातील. तसेच सामान्य नागरिकांना पोलीस प्रशासनाकडून तात्काळ मदत मिळवून देण्यासाठी आम्ही कटिबद्ध आहोत.”
नशिराबाद परिसरातील ग्रामस्थांनी आणि पोलीस कर्मचाऱ्यांनी त्यांचे पुष्पगुच्छ देऊन स्वागत केले. एका महिला अधिकाऱ्याकडे पोलीस स्टेशनची सूत्रे आल्याने महिला सुरक्षेच्या दृष्टीनेही सकारात्मक वातावरण निर्माण झाले आहे.
