कल्याण (महाराष्ट्र राज्य क्राइम रिपोर्टर प्रविण जाधव) । केवळ धार्मिक विधींपुरते मर्यादित न राहता सामाजिक एकोपा आणि नव्या पिढीवर संस्कार घडवण्याच्या उद्देशाने, रॉयल ड्रीम सोसायटीत नुकताच सलग तीन दिवसांचा भव्य सांस्कृतिक व क्रीडा महोत्सव उत्साहात पार पडला. सोसायटीच्या वार्षिक पूजा महोत्सवानिमित्त आयोजित या उपक्रमाने उपस्थित सर्वांचे लक्ष वेधून घेतले.
खेळ, कला आणि बौद्धिक कौशल्यांचा संगम
कार्यक्रमाच्या पहिल्या दोन दिवसांत लहान मुलांच्या सुप्त गुणांना वाव देण्यासाठी बौद्धिक, कला आणि क्रीडा स्पर्धांचे आयोजन करण्यात आले होते. यामध्ये चित्रकला, वक्तृत्व आणि विविध मैदानी खेळांचा समावेश होता. या उपक्रमामुळे लहान मुलांमध्ये चुरस तर दिसलीच, पण त्यासोबतच संघभावना आणि शिस्तीचे धडेही त्यांना मिळाले.
मैदानावर रंगला क्रिकेटचा थरार
उत्सवाचे खास आकर्षण ठरली ती म्हणजे भव्य क्रिकेट स्पर्धा. लहानांपासून मोठ्यांपर्यंत सर्वच वयोगटातील सदस्यांनी या स्पर्धेत उत्स्फूर्त सहभाग नोंदवला. सोसायटीच्या मैदानावर रंगलेल्या या सामन्यांमुळे रहिवाशांमधील स्नेहबंध अधिक घट्ट झाल्याचे पाहायला मिळाले.
विजेत्यांचा गौरव
कार्यक्रमाच्या समारोपप्रसंगी सर्व उत्कृष्ट खेळाडू आणि विविध स्पर्धांमधील विजेत्यांना आकर्षक ट्रॉफी व पारितोषिके देऊन सन्मानित करण्यात आले. “एकत्र येऊन उत्सव साजरा करणे आणि एकमेकांच्या सुख-दुःखात सहभागी होणे हीच आपली खरी संस्कृती आहे,” अशी भावना यावेळी सोसायटीच्या कमिटी सदस्यांनी व्यक्त केली.
