जळगाव (महाराष्ट्र राज्य क्राइम रिपोर्टर राहुल मस्के) । जागतिक महिला दिनाचे औचित्य साधून जनमत प्रतिष्ठान आणि वेदांत एज्युकेशन/दिशा स्पर्धा यांच्या संयुक्त विद्यमाने मेहरूण येथील राज विद्यालय येथे एका विशेष गौरव सोहळ्याचे आयोजन करण्यात आले होते. या कार्यक्रमात समाजातील विविध क्षेत्रांत उल्लेखनीय कामगिरी करणाऱ्या २७ महिलांना सन्मानित करण्यात आले.
विविध क्षेत्रातील महिलांचा सन्मान
कार्यक्रमात २१ महिलांना त्यांच्या उल्लेखनीय कार्याबद्दल पुष्पगुच्छ, ट्रॉफी आणि सन्मानचिन्ह (फ्रेम) देऊन गौरविण्यात आले. तसेच, आरोग्य सेवा क्षेत्रात मोलाचे योगदान देणाऱ्या सिव्हिल हॉस्पिटलमधील ६ परिचारिकांचाही यावेळी विशेष सन्मान करण्यात आला. अशा एकूण २७ महिलांचा गौरव करून त्यांच्या कर्तृत्वाला सलाम करण्यात आला.
मान्यवरांची उपस्थिती
या सोहळ्याला प्रमुख अतिथी म्हणून प्रा. रफिक शेख, माजी महापौर सौ. जयश्रीताई महाजन, नगरसेविका जयश्रीताई पाटील, डॉ. संदीप पाटील, निलेश बनसोडे, हेमंत दाभाडे, सौ. अर्चनाताई माळी, भारती काळे, संदीप राणे आणि राहुल पाटील आदि मान्यवर उपस्थित होते. उपस्थित मान्यवरांनी महिला दिनाचे महत्त्व विशद करत महिलांच्या सामाजिक योगदानाचे कौतुक केले.
नियोजन आणि सूत्रसंचालन
कार्यक्रमाचे उत्कृष्ट नियोजन जनमत प्रतिष्ठानचे अध्यक्ष पंकज नाले व सचिव हर्षाली पाटील यांनी केले. कार्यक्रमाचे प्रभावी सूत्रसंचालन हेमंत बडगुजर यांनी केले.
