नाशिक (संपादक खुशाल देवरे) | बागलाण तालुक्यातील सटाणा–ताहाराबाद मार्गावर मंगळवारी रात्री एक भीषण अपघात झाला. या अपघाताने संपूर्ण तरसाळी गावावर दुःखाचा डोंगर कोसळला आहे. आपल्या गावापासून अवघ्या एक किलोमीटर अंतरावर असताना, ट्रक आणि मोटारसायकलच्या समोरासमोर झालेल्या जोरदार धडकेत दोन तरुण मित्रांचा दुर्दैवी मृत्यू झाला.
मिळालेल्या माहितीनुसार, साक्री–शिर्डी राष्ट्रीय महामार्गावरील औंदाणे फाटा परिसरातील ‘हॉटेल सैनिक’ जवळ रात्री नऊ वाजेच्या सुमारास हा अपघात घडला. ताहाराबादच्या दिशेने जाणारा एक ट्रक कथितपणे चुकीच्या बाजूने (Wrong Side) येत होता. याच वेळी समोरून येणाऱ्या मोटारसायकलला या ट्रकने जोरदार धडक दिली.
या भीषण अपघातात तरसाळी येथील रहिवासी तेजस अशोक ठाकरे यांचा घटनास्थळीच मृत्यू झाला. तर त्यांचे मित्र प्रल्हाद शरद पवार हे गंभीर जखमी झाले होते. अपघात घडताच स्थानिक नागरिकांनी आणि प्रशासनाने त्यांना तातडीने रुग्णालयात दाखल केले, मात्र दुर्दैवाने उपचारादरम्यान त्यांचीही प्राणज्योत मालवली.
हे दोघे मित्र घराकडे परतत असताना, गावाच्या अगदी जवळच काळाने त्यांच्यावर झडप घातल्याने परिसरातून तीव्र हळहळ व्यक्त होत आहे. घटनेची माहिती मिळताच ग्रामस्थांनी घटनास्थळी धाव घेतली. सटाणा पोलिसांनी तात्काळ घटनास्थळी भेट देऊन पंचनामा केला असून पुढील तपास सुरू केला आहे.
या महामार्गावर गेल्या काही दिवसांत अपघातांचे प्रमाण मोठ्या प्रमाणावर वाढले आहे. रस्त्याचे रुंदीकरण झाल्यापासून वाहनांचा वेग प्रचंड वाढला असून, यामुळेच निष्पाप नागरिकांचे नाहक बळी जात असल्याचा आरोप ग्रामस्थांनी केला आहे. “अपघातप्रवण ठिकाणी तातडीने स्पीड ब्रेकर (गतिरोधक) उभारण्यात यावेत आणि वाहतूक नियंत्रणासाठी प्रशासनाने कठोर पावले उचलावीत,” अशी मागणी आता नागरिकांमधून जोर धरू लागली आहे. दोन होतकरू आणि तरुण मुलांच्या अशा अकाली निधनामुळे तरसाळी गावासह संपूर्ण बागलाण तालुक्यात शोककळा पसरली आहे.
