नाशिक (संपादक खुशाल देवरे) | मालेगाव तालुक्यातील चाळीसगाव-मालेगाव महामार्गावरील दहिवळ गावाजवळ सोमवारी दुपारी एक भीषण अपघाताची घटना घडली. चारचाकी वाहन आणि मोटारसायकल यांच्यात झालेल्या या जोरदार धडकेत बागलाण तालुक्यातील मुंजवाड येथील २८ वर्षीय युवकाचा जागीच दुर्दैवी मृत्यू झाला, तर त्याचा सोबती गंभीर जखमी झाला आहे. या हृदयद्रावक घटनेमुळे मुंजवाड गावासह संपूर्ण परिसरावर तीव्र शोककळा पसरली आहे.
मिळालेल्या माहितीनुसार, मुंजवाड येथील भूषण राजेंद्र खैरणार (वय २८) आणि नरेश रामदास काकुळते हे दोघे तरुण आपल्या मोटारसायकलने चाळीसगावकडून मालेगावच्या दिशेने जात होते. प्रवास दरम्यान दहिवळ गावाजवळील शनीमंदिर परिसरात समोरून येणाऱ्या एका भरधाव चारचाकी वाहनाने त्यांच्या दुचाकीला जोरदार धडक दिली.
हा अपघात इतका भीषण होता की, धडकेनंतर दोघेही तरुण महामार्गावर फेकले गेले आणि गंभीर जखमी झाले. अपघाताचा आवाज ऐकून परिसरातील स्थानिक नागरिकांनी तातडीने घटनास्थळी धाव घेतली. त्यांनी रुग्णवाहिका बोलावून दोन्ही जखमींना तात्काळ मालेगाव येथील सामान्य रुग्णालयात (सिव्हिल हॉस्पिटल) दाखल केले.
दोघांपैकी भूषण खैरणार यांच्या डोक्याला आणि शरीराला गंभीर दुखापत झाल्यामुळे त्यांची प्रकृती अत्यंत चिंताजनक होती. रुग्णालयात पोहोचवल्यानंतर डॉक्टरांनी तपासणी करून उपचारापूर्वीच त्यांना मृत घोषित केले. भूषण यांच्या निधनाने खैरणार परिवारासह मुंजवाड गावावर दुःखाचा डोंगर कोसळला आहे.
या अपघातात गंभीर जखमी झालेले दुसरे तरुण नरेश काकुळते यांच्या पायाला, डोक्याला आणि चेहऱ्यावर गंभीर दुखापती झाल्या आहेत. त्यांच्यावर सध्या मालेगाव येथील एका खाजगी रुग्णालयात अतिदक्षता विभागात उपचार सुरू आहेत. या घटनेची माहिती मिळताच पोलिसांनी घटनास्थळी धाव घेतली असून, अपघाताचा पुढील तपास पोलीस करत आहेत.
