दोषी पोलिसांवर निलंबनाची आणि मुख्य आरोपींवर गुन्हा दाखल करण्याची मृताच्या भावाची मागणी
जळगाव (विशेष प्रतिनिधी): मोटारसायकल अपघातात गंभीर जखमी झालेल्या तरुणाचा उपचारादरम्यान मृत्यू झाल्यानंतर, या प्रकरणातील आरोपींना कोणतीही कारवाई न करता सोडून दिल्याचा खळबळजनक प्रकार पाचोरा पोलीस स्टेशन अंतर्गत समोर आला आहे. या प्रकरणी शासकीय कामात अक्षम्य निष्काळजीपणा करणाऱ्या संबंधित पोलीस कर्मचाऱ्यांना तातडीने निलंबित करावे आणि दोषींवर गुन्हा दाखल करावा, अशी मागणी मृताच्या भावाने केली आहे. दोन दिवसांत कारवाई न झाल्यास जळगाव पोलीस अधीक्षक कार्यालयासमोर संपूर्ण कुटुंबासह आमरण उपोषणाला बसण्याचा इशारा तक्रारदाराने दिला आहे.
मिळालेल्या माहितीनुसार, कुरंगी गावाकडून नांद्रा येथे गोविंदा त्र्यंबक कुंभार हा त्याच्या मित्रासह मोटारसायकलने (मो.सा.) बाबादेव मंदिराजवळून जात होता. त्याच वेळी समोरून एका मोटारसायकलवर ट्रिपल सीट (तीन जण) अत्यंत भरधाव वेगात आले. या ट्रिपल सीट चालकाने गोविंदाच्या मोटारसायकलला समोरून जोरदार धडक (ठोस) दिली. ही धडक इतकी भीषण होती की गोविंदा आणि त्याचा मित्र दोघेही जमिनीवर कोसळून गंभीर जखमी झाले. अपघात घडताच स्थानिक गावकऱ्यांनी घटनास्थळी धाव घेतली. जखमी गोविंदाचा भाऊ दीपक कुंभार याने गावकऱ्यांच्या मदतीने दोघांना तातडीने जळगाव येथील ‘एक्झॉन ब्रेन हॉस्पिटल’ येथे औषधोपचारासाठी दाखल केले.
अपघाताची माहिती गावकऱ्यांनी तात्काळ फोनवरून पाचोरा पोलीस स्टेशनला दिली होती. तसेच अपघात घडवणाऱ्या ट्रिपल सीट मोटारसायकलवरील तिन्ही आरोपींना गावकऱ्यांनी घटनास्थळीच पकडून ठेवले होते. पुढील कायदेशीर कारवाईसाठी या तिघांनाही पोलिसांच्या स्वाधीन करण्यात आले. मात्र, पाचोरा पोलीस ठाण्याच्या संबंधित कर्मचाऱ्यांनी पोलीस स्टेशनला नेऊन कोणतीही कायदेशीर कारवाई न करता त्या तिन्ही आरोपींना सोडून दिल्याचा गंभीर आरोप मृताच्या भावाने केला आहे.
गोविंदाची प्रकृती चिंताजनक असल्याने एक्झॉन ब्रेन हॉस्पिटलच्या डॉक्टरांनी जळगाव जिल्हापेठ पोलिसांना एम.एल.सी. नं. ५६५/२०२६ अन्वये जखमींचा जबाब नोंदवण्यासाठी कळवले होते. परंतु, जखमी तरुण बेशुद्ध अवस्थेत असल्याने त्यांचा जबाब नोंदवता आला नाही.
याबाबत जिल्हापेठ पोलीस ठाण्याचे अंमलदार पोहेकॉ (ब.नं. ३०९६) रुस्तम तडवी यांनी स्टे.डा.नं. ०३६/२०२६, दिनांक १९/०४/२०२६ रोजी रात्री २०.५३ वाजता रीतसर डायरी नोंद घेतली. पुढील आवश्यक कारवाई व जखमींचे जबाब नोंदवण्यासाठी त्यांनी पाचोरा पोलीस स्टेशनचे अंमलदार पोहेकॉ वाघमारे यांना अधिकृतपणे कळवले होते.
परंतु, पाचोरा पोलीस ठाण्याचे पोहेकॉ वाघमारे हे स्वतः जळगाव येथे जबाब नोंदवण्यासाठी गेले नाहीत, की त्यांनी इतर कोणत्याही कर्मचाऱ्याला तिथे पाठवले नाही. पोलिसांच्या या हलगर्जीपणामुळे कायदेशीर प्रक्रियेत मोठा अडथळा निर्माण झाला असून त्यांनी सरकारी कामात अक्षम्य निष्काळजीपणा केल्याचे उघड झाले आहे.
दुर्दैवाने, भरधाव ट्रिपल सीट चालकाच्या धडकेमुळे गंभीर जखमी झालेल्या गोविंदा कुंभार याचा मृत्यू झाला आहे. आपल्या भावाच्या मरणास कारणीभूत ठरलेल्या त्या ट्रिपल सीट चालकाविरुद्ध लवकरात लवकर गुन्हा दाखल करून कडक कारवाई करावी, अशी मागणी दीपक कुंभार यांनी केली आहे.
“ज्या पोलिसांनी आरोपींना बेकायदेशीरपणे सोडून दिले आणि जबाब नोंदवण्यात टाळाटाळ केली, त्या पोहेकॉ वाघमारे यांच्यासह सर्व संबंधित कर्मचाऱ्यांवर निलंबनाची कारवाई झाली पाहिजे. जर पुढील दोन दिवसांत मुख्य आरोपींवर गुन्हा दाखल झाला नाही, तर मी माझ्या संपूर्ण कुटुंबासह जळगाव पोलीस अधीक्षक कार्यालयाबाहेर आमरण उपोषणाला बसणार आहे,” असा इशारा मृत गोविंदाचा भाऊ दीपक कुंभार यांनी दिला आहे. या गंभीर प्रकरणामुळे आता पाचोरा पोलिसांच्या कार्यपद्धतीवर प्रश्नचिन्ह निर्माण झाले असून वरिष्ठ अधिकारी यावर काय कारवाई करतात, याकडे सर्वांचे लक्ष लागले आहे.
