नागपूर (कार्यालय प्रतिनिधी) – प्रशासनाच्या आदेशाचे उल्लंघन करीत हजारो वऱ्हाड्यांच्या उपस्थितीत न्यू येरखेडा परिसरातील राज रॉयल लॉनमध्ये सुरू असलेल्या लग्नसमारंभात पोलिसांनी छापा टाकला. याप्रकरणी पोलिसांनी लॉनमालक, वधू आणि वराच्या नातेवाइकांविरुद्ध आदेशाचे उल्लंघन, साथरोग कायद्यासह विविध कलमान्वये गुन्हे दाखल केले.
करोना प्रादुर्भाव रोखण्यासाठी प्रशासनाने केवळ ५० वऱ्हाड्यांच्या उपस्थितीतच लग्नसमारंभाला परवानगी दिली. मात्र, बेपर्वाई सुरूच असल्याचे दिसते. नवीन कामठातील मोहम्मद असलम मोहम्मद सिद्दीकी यांच्या दोन मुलांचे बुधवारी सायंकाळी राज रॉयल लॉनमध्ये लग्न होते. लग्नात दीड ते दोन हजार वऱ्हाडी असल्याची माहिती पोलिस उपायुक्त नीलोत्पल यांना मिळाली. त्यांच्या मार्गदर्शनाखाली पोलिसांनी यांनी लॉनमध्ये छापा टाकला.
पोलिसांचा छापा पडताच वऱ्हाड्यांमध्ये खळबळ उडाली. ते सैरावैरा पळायला लागले. पोलिसांनी लॉनमालक सुरेंद्र सिंग गुरुदत्त सिंग (५४), मुलाचे वडील मोहम्मद असलम मोहम्मद सिद्दीकी (वय ५५, रा. संघर्षनगर), वधूचे वडील शेख निसार अन्य एका वधूचे वडील शौकत अली (रा. कोराडी) यांना ताब्यात घेतले.
