कोलकाता (पश्चिम बंगाल) – येथील विधानसभा निवडणुकीसाठी पंतप्रधान नरेंद्र मोदींची कोलकात्यातील ब्रिगेड मैदानावर जंगी सभा होत आहे. विशेष म्हणजे या सभेला भाजप नेत्यांसोबत ज्येष्ठ अभिनेते मथुन चक्रवर्ती हे उपस्थित आहेत. मिथुन चक्रवर्ती यांनी पंतप्रधान मोदींचे भाषण सुरू होण्यापूर्वी भाजपमध्ये प्रवेश केला आहे.
पंतप्रधान मोदींची ही सभा ऐतिहासिक असेल, असा दावा भाजप नेत्यांकडून केला जातोय. या सभेत १० लाखांहून अधिक नागरिक सहभागी होतील, असं भाजप नेते सांगत आहेत. सभेसाठी पूर्ण तयारी झाली आहे. तसंच कडक सुरक्षा ठेवण्यात आली आहे. सभेत १५०० सीसीटीव्ही कॅमेऱ्या लावण्यात आले आहेत. तर सुरक्षेसाठी ३००० जवान तैनात केले आहेत.
कोलकाताच्या ब्रिगेड मैदानावर ही सभा होत आहे. पश्चिम बंगाल भाजपचे अध्यक्ष दिलीप घोष, अभिनेते मिथुन चक्रवर्ती आणि पश्चिम बंगाल भाजपचे प्रभारी कैलास विजय वर्गी हे उपस्थित आहेत. मिथुन चक्रवर्ती यांनी भाजपमध्ये प्रवेश केला आहे. पंतप्रधान मोदींच्या मुखवटा घातलेले शेकडो भाजप कार्यकर्ते मैदानावर येत आहेत.
ज्येष्ठ अभिनेते मिथुन चक्रवर्ती हे भाजपमध्ये प्रवेश करणार असल्याची जोरदार चर्चा होती. कैलास विजयवर्गीय यांनी शनिवारी मिथुन चक्रवर्ती यांच्याशी चर्चा केली. आपण मिथुन चक्रवर्ती यांच्याशी फोनवर चर्चा केली आहे. त्यांच्याशी सविस्तर चर्चा झाल्यानंतरच आपण बोलू, असं विजयवर्गीय शनिवारी म्हणाले होते. तृणमूल काँग्रेसचा राजीनामा देण्यापूर्वी मिथुन चक्रवर्ती हे दोन वर्ष पक्षाचे राज्यसभेचे खासदार होते.
