मुंबई (प्रतिनिधी गणेश तळेकर) -छोट्या पडद्यावरील प्रसिद्ध रिअॅलिटी शो ‘इंडियन आयडल १२’ च्या समोरील अडचणी संपण्याचं नाव घेत नाहीत. हा शो पुन्हा एकदा वादाच्या भोवऱ्यात अडकला आहे. सोशल मीडियावर कार्यक्रमाबाबत अनेक चर्चा सुरू आहेत. एकीकडे कार्यक्रमातील स्पर्धक त्यांच्या गोड गळ्याने प्रेक्षकांची मनं जिंकून घेत आहेत. तर दुसरीकडे स्पर्धकांच्या गरिबीचं कार्यक्रमात प्रदर्शन मांडलं जात असल्याचं सांगत नेटकऱ्यांनी कार्यक्रमाच्या निर्मात्यांना धारेवर धरलं आहे.
इतकंच नाही तर शोमधील स्पर्धकांवर खोटं बोलण्याचे आरोपदेखील केले जात आहेत. आधी सवाई भट्ट आणि आता सायली कांबळेमुळे इंडियन आयडल १२ चर्चेत आहे. कार्यक्रमात दाखवण्यात आल्याप्रमाणे सायली अत्यंत गरीब घरातून आली असून तिचे वडील रुग्णवाहिका चालक आहेत. त्यांच्या घराची परिस्थिती बेताची असल्याचं तिने म्हटलं होतं.
जॅकी श्रॉफ यांच्या उपस्थितीत झालेल्या भागात सायलीने तिच्या घरी टीव्ही नसल्याचं सांगितलं होतं. त्यानुसार कार्यक्रमात दाखवलं होतं की, कशी एका गरीब घरातील मुलगी प्रतिकूल परिस्थितीवर मात करून इंडियन आयडलच्या मंचापर्यंत पोहोचली. परंतु, सोशल मीडियावर सायलीचा एक व्हिडीओ वायरल होत आहे. ज्यात ती संगीत क्षेत्रातील दिग्गज गायक सुरेश वाडकर यांच्यासोबत मंचावर गाणं गात आहे. हा व्हिडीओ सोशल मीडियावर वायरल झाल्यानंतर नेटकऱ्यांनी कार्यक्रमाच्या निर्मात्यांना प्रश्न विचारायला सुरुवात केली आहे.
नेटकऱ्यांच्या मते, जर सायली इतक्या मोठ्या कलाकारासोबत मंचावर गाणं गातेय तर ती अशीच कोणतीही छोटी कलाकार नाही. शिवाय नेटकऱ्यांनी निर्मात्यांना विचारणा केली आहे की, जर कार्यक्रमात सहभागी होणाऱ्या स्पर्धकांची निवड आधीपासूनच झालेली असते तर ऑडिशन्स कशासाठी घेण्यात येतात. याआधीही कार्यक्रमाच्या निर्मात्यांवर टीआरपी वाढवण्यासाठी स्पर्धकांना गरीब दाखवण्याचा आरोप करण्यात आला होता.
कार्यक्रमातील दुसरा स्पर्धक सवाई भट्टच्या घरातील परिस्थितीदेखील अशाच रितीने प्रेक्षकांना दाखवण्यात आली होती. त्यानंतर गीतकार संतोष आनंद यांच्या गरिबीचं कारण देत नेहाने त्यांना मदत देऊ केली होती. हा सर्व प्रकार टीआरपीसाठी करण्यात येत असल्याचं सांगून नेटकऱ्यांनी निर्मात्यांना सुनावलं होतं.
