मुंबई (उपसंपादक दिलीप दळवी) – मुंबईत करोना रुग्णांचे प्रमाण वाढत आहेत. यातच मुंबईकरांच्या चिंतेत भर घालणारी एक बातमी समोर येत आहे. मुंबईतील प्रसिद्ध दादर मार्केट येथे सात फेरीवाल्यांची करोना चाचणी पॉझिटिव्ह आली आहे. यामुळं दादर मार्केट परिसरात खळबळ माजली आहे.
मुंबईत गेल्या काही दिवसांपासून करोना बाधित रुग्णांची संख्या झपाट्याने वाढत असून ती रोखणे हे मुंबई महापालिकेपुढे आव्हान आहे. यासाठीच महापालिकेनं गर्दीची ठिकाणी लक्ष्य केली आहेत. गर्दीच्या ठिकाणी दररोज ५० हजार चाचण्या करण्याचे लक्ष्य ठेवण्यात आले आहे. यामध्ये समुद्र किनारे, मॉल, गर्दीची इतर ठिकाणे, खाण्यापिण्याची ठिकाणे, खाऊगल्ल्या अशा सार्वजनिक ठिकाणांवर करोनाच्या अँटिजेन चाचण्या करण्याचे महापालिकेने निश्चित केले आहे.
त्यानुसार सोमवारी दादर पश्चिम रेल्वे स्थानकाच्या शेजारी असलेल्या सेनापती बापट मार्गावरील फेरीवाल्याची चाचणी करण्यात आली असता त्यात सात फेरीवाले पॉझिटिव्ह आढळले आहेत. त्या सातही फेरीवाल्यांना त्वरीत महापालिकेच्यावतीने संस्थात्मक विलगीकरणात अर्थात क्वारंटाईन करण्यात आले असल्याची माहिती सहायक आयुक्त दिघावकर यांनी दिली आहे.
जी उत्तर विभागात पालिकेन करोना चाचण्या घेण्यासाठी विविध उपाययोजना केल्या आहेत. दादर येथील शिवाजी मंदिर परिसरात आज ३१ जणांच्या चाचण्या घेण्यात आल्या या ३१ जणांपैकी सर्वांचे अहवाल निगेटिव्ह आले आहेत. तर, सेनापती बापट मार्ग परिसरात ४० जणांच्या चाचण्या करण्यात आल्या आहेत. कोतवाल गार्डन परिसरात घेतलेल्या ७१ चाचण्यांपैकी १ जणांचा अहवाल पॉझिटिव्ह आला आहे.
