नवी दिल्ली – काँग्रेस नेते आणि केरळच्या वायनाड मतदारसंघाचे खासदार राहुल गांधी हे निवडणूक प्रचारादरम्यान एका वेगळ्यात अंदाजात दिसले. विद्यार्थ्यांशी, तरुणांशी थेट संवाद साधण्यावर त्यांनी जास्तीत जास्त भर दिला. त्यांच्यासोबत खेळीमेळीनं गप्पा मारल्या, त्यांचं म्हणणं ऐकून घेतलं आणि त्यांच्या विविध प्रश्नांची उत्तरंही दिली. आता राहुल गांधी यांनी एका चिमुरड्याचं अवकाश उड्डाण घडवून आणत त्याला त्याच्या स्वप्नाच्या आणखीन जवळ नेण्याचा प्रयत्न केलाय.
राहुल गांधी यांनी सोशल मीडियावर नुकताच एक व्हिडिओ शेअर केलाय. या व्हिडिओत ते ३ एप्रिल रोजी कन्नूरमध्ये एका कॅफेत अद्वैत सुमेश नावाच्या एका अवघ्या सात वर्षांच्या चिमुरड्याशी आपुलकीनं संवाद साधताना दिसले होते. मोठं होऊन पायलट बनण्याचं स्वप्न असल्याचं यावेळी चिमुरड्या अद्वैतनं म्हटलं होतं.
पुढच्याच दिवशी राहुल गांधी यांनी अद्वैतला विमानाच्या कॉकपीटमध्ये बोलावून घेतलेलं या व्हिडिओत दिसतंय. राहुल गांधी अद्वैतला घेऊन आपल्या विमानाच्या कॉकपिटमध्ये गेले. विमानाची कंट्रोल सिस्टम दाखवत त्यांनी अद्वैतशी गप्पा मारल्या. ‘कोणतंही स्वप्न खूप मोठं नसतं. आम्ही अद्वैतचं स्वप्न साकार करण्यासाठी पहिलं पाऊल उचललं. आता आपलं कर्तव्य आहे की आपण एक असा समाज आणि संरचना तयार करायला हवी जी त्याला उड्डाण घेण्याची संधी उपलब्ध करून देईल’ असं राहुल गांधी यांनी या व्हिडिओसोबत सोशल मीडियावर म्हटलंय.
अद्वैत कन्नूरच्या एका खासगी शाळेत तिसऱ्या इयत्तेत शिकतो. त्याचे पिता सुमेश सरकारी कर्मचारी आहेत. राहुल यांनी अद्वैतचे वडील सुमेश आणि आई सुवर्ण यांना आपल्यासोबत विमानानं कालीकत ते तिरुअनंतपुरम प्रवास करण्याची विनंती केली होती. परंतु, सुमेश सरकारी कर्मचारी असल्यानं ते इलेक्शन ड्युटीवर आहेत. त्यामुळे त्यांना जाता आलं नाही. त्यामुळे आपल्यासोबत आलेल्या अद्वैतशी राहुल गांधींनी हिंदी आणि इंग्रजीत गप्पा मारल्या. सेनेतून निवृत्त झालेल्या आपल्या आजोबांकडून अद्वैतनं हिंदी भाषा शिकली आहे.
या अगोदर तमिळनाडूत कन्याकुमारीच्या दौऱ्यावर असणाऱ्या राहुल गांधींची भेट १२ वर्षांच्या एन्टनी फेलिक्स या मुलासोबत झाली होती. तामिळनाडूचे माजी मुख्यमंत्री कामराज यांचं पोस्टर घेऊन फेलिक्स यावेळी इथं उभा होता. राहुल गांधींशी बोलताना फेलिक्सनं आपल्याला धावणं आवडत असल्याचं सांगितलं. त्यानंतर राहुल गांधींनी फेलिक्सला स्पोर्टस शूज पाठवण्याचं आणि ट्रेनिंगसाठी एखाद्या अकॅडमीत प्रवेश मिळवण्यासाठी मदत करण्याचं आश्वासन दिलं होतं. त्यानुसार, राहुल गांधी यांनी फेलिक्सला स्पोर्ट शूजही भेट म्हणून पाठवले होते.
