नागपूर (कार्यालय प्रतिनिधी) – आयसोलशन हॉस्पिटलमध्ये असलेल्या कोव्हिड केअर सेंअरमध्ये गुन्हेगारांच्या टोळीने हैदोस घालून तोडफोड केली. ही घटना रविवारी सायंकाळी इमामवाडा भागात घडली. या घटनेने रूग्ण व त्यांच्या नातेवाइकांमध्ये प्रचंड दहशतीचे वातावरण असून, काही काळ तणाव निर्माण झाला होता.
बादल, रिंकी, डेव्हिड, ललित व त्याचे साथीदार,अशी गुन्हेगारांची नावे असल्याचे कळते.इमामवाड्यातील या हॉस्पिटलमध्ये कोव्हिडकेअर सेंटर आहे. सायंकाळी बादल याचा एक साथीदार जखमी झाला. त्याला घेऊन बादल व अन्य गुन्हेगार तेथे आले. जखमी साथीदारावर तत्काळ उपचार करा, अशी धमकी बादल याने येथील कर्मचाऱ्यांना दिली. हे कोव्हिड केअर सेंटर असून, जखमीला मेडिकल कॉलेज हॉस्पिटलमध्ये घेऊन जा,असे येथील कर्मचाऱ्यांनी बादल याला सांगितले.
बादल व त्याचे साथीदार संतापले. भाईला उलट उत्तर देतो,असे म्हणत बादल व त्याच्या साथीदारांनी सेंटरमध्ये तोडफोड करायला सुरूवात केली. सुमारे २० मिनिटे हॉस्पिटलमध्ये हैदोस घातला. घटनेची माहिती मिळताच इमामवाडा पोलिसांचा ताफा तेथे पोहोचला. पोलिसांना बघताच गुन्हेगार फरार झाले. रात्री पोलिसांनी दोघांना ताब्यात घेतले होते, अशी माहिती आहे.
