अहमदनगर (प्रतिनिधी) – सततच्या आणि गंभीर आजाराला कंटाळून भिंगार शहरातील ज्येष्ठ दाम्पत्याने एकमेकांच्या हाताच्या नस कापून घेतल्या. यामध्ये पतीचा मृत्यू झाला असून गंभीर जखमी झालेल्या पत्नीवर उपचार सुरू आहेत. घटनेची माहिती मिळाल्यानंतर पोलिसांनी धाव घेतल्याने महिलेचे प्राण वाचले. त्यांनी लिहून ठेवलेल्या चिठ्ठीवरून घटनेचा उलगडा झाला.
भिंगार शहरातील आलमगीर रोड येथील द्वारकाधीश कॉलनी परिसरामध्ये ही धक्कादायक घटना घडली. यामध्ये उषन्ना रामन्ना वरगंठे (वय ७८) यांचा मृत्यू झाला. तर त्यांची पत्नी शकुंतला उषन्ना वरगंठे (वय ६९ वर्ष) यांच्यावर उपचार सुरू आहेत. द्वारकाधीश कॉलनी परिसरामध्ये हे जोडपं गेल्या अनेक वर्षापासून राहत आहे. त्यांना दोन मुले आहेत. एक मुलगा नगर शहरातील सावेडी परिसरामध्ये राहतो तर दुसरा मुलगा पुण्यात वास्तव्यास आहे. उषन्ना वरगुंठे यांना कॅन्सर झालेला होता. तर त्यांची पत्नी शकुंतला यांना हृदयविकार तसेच अन्य आजारही आहेत. गेल्या काही वर्षांपासून ते दोघेही उपचार घेत होते. मात्र, अपेक्षित परिणाम होत नसल्याने दोघेही कंटाळले होते. त्यामुळे आपण जगून तरी काय उपयोग, असा विचार त्यांच्या डोक्यात आला. त्यातून त्यांनी हा प्रकार केला. उषन्ना यांनी लिहून ठेवलेली चिठ्ठी पोलिसांना मिळाली. त्यातून या घटनेचा उलगडा झाला. या चिठ्ठीमध्ये त्यांनी त्यांच्या आजाराची सर्व माहिती देत आपण जीवनाला कंटाळलो असल्याचे नमूद केले.
नस कापल्या गेल्याने हे दोघेही घरातच कोसळले. आजूबाजूच्या लोकांच्या लक्षात आल्यानंतर त्यांनी पोलिसांना कळविले. भिंगार कॅम्प पोलीस ठाण्याचे पोलीस निरीक्षक शिरीषकुमार देशमुख पथकासह घटनास्थळी दाखल झाले. त्यांनी दोघांनाही जिल्हा रुग्णालयात दाखल केले. तोपर्यंत उषन्ना वरगंठे यांचा मृत्यू झाल्याचे सांगण्यात आले. गंभीर जखमी महिलेवर खासगी रुग्णालयात उपचार सुरू आहेत. प्राथमिक चौकशीत दोघांनीही एकमेकांच्या हातावर वार करून नस कापल्याचे पुढे आले आहे. भिंगार कॅम्प पोलीस ठाण्यांमध्ये अकस्मात मृत्यूची नोंद करण्यात आली आहे. पोलीस उपअधीक्षक विशाल ढुमे यांनीही घटनास्थळी भेट देऊन पोलिसांना तपासाच्या सूचना केल्या. सहाय्यक पोलीस निरीक्षक शिरीषकुमार देशमुख, उपनिरीक्षक बी. एस. देशमुख, राजेंद्र सुद्रिक, राहुल द्वारके धामणे पुढील तपास करीत आहेत.
